Eýropalyq avıatsııalyq retteýshi organ avıakompanııalardy Irannyń ústinen ushpaýǵa shaqyrdy

ASTANA. KAZINFORM — Eýropalyq avıatsııa qaýipsizdigi agenttigi (EASA) juma, 16 qańtar kúni keshke áýe tasymaldaýshylaryna Iran áýe keńistiginde ushýdan aýlaq bolýǵa keńes berdi. EASA saıtynda jarııalanǵan málimdemege sáıkes, bul eskertý bıiktiktiń barlyq deńgeılerine qatysty, dep habarlaıdy DW aqparat agenttigi. 

 — Qazirgi jaǵdaıdy jáne AQSh tarapynan áskerı áreketter jasaý múmkindigin eskere otyryp, Irannyń áýe qorǵanys kúshteri joǵary daıyndyq deńgeıinde tur. Osyǵan baılanysty Irannyń áýe keńistiginde qatelesip anyqtaý yqtımaldyǵy artty. Áýe qorǵanysy júıeleriniń keń aýqymda bolýy jáne memlekettiń boljamsyz áreketi, sondaı-aq áýe qorǵanysy júıeleriniń iske qosylý múmkindigi azamattyq reıster úshin barlyq bıiktikter men ushý deńgeılerinde joǵary qaýip-qater týdyrady, — dep atap ótedi retteýshi organ. 

EASA baǵalaýynsha, AQSh basyp kirýi jaǵdaıyndaǵy Iran Islam Respýblıkasynyń aımaqtaǵy AQSh aktıvterine qarsy kek alý áreketterin joqqa shyǵarýǵa bolmaıdy. Bul AQSh áskerı bazalary ornalasqan kórshiles elderdiń áýe keńistigine qosymsha qaýip tóndirýi múmkin, dep atap ótildi habarlamada.

Al Hadath telearnasy buǵan deıin Iran bıliginiń Irak shekarasyna jaqyn áýe keńistigin jabýdy buıyrǵanyn habarlaǵan. Bul habarlamalar AQSh-tyń áýe shabýyly bolýy múmkin degen boljamdardy týdyrdy, dep túsindirdi dpa.

— Ne isteıtinin tek prezıdent Tramp qana biledi, al onyń josparlary týraly keńesshilerdiń óte az toby ǵana biledi, — dep málimdedi Aq úıdiń baspasóz hatshysy.

Sonymen qatar, Irandaǵy Ýkraına elshiligi «qaýipsizdik jaǵdaıynyń ýshyǵýyna baılanysty» jumysyn toqtatatynyn málimdedi. 

— Elshiliktiń jumysyn qaıta bastaý, sondaı-aq odan ári áreketter men yqtımal ózgerister týraly keıinirek habarlanady, — delingen dıplomatııalyq mıssııanyń Facebook-tegi paraqshasynda.

 Buǵan deıin Air Astana Iran áýe keńistiginiń jabylýyna baılanysty keıbir turaqty jáne charterlik reısteriniń marshrýttaryn ózgertkenin habarlady. 

Iranda jaǵdaı kúnnen kúnge kúrdelenip barady. Elde jappaı narazylyq jalǵasyp, bılik olardy qatań basyp-janshyp jatyr. Osy tusta AQSh kóshege shyqqan halyqty qoldaýy múmkin degen kúdik te artyp otyr. Prezıdent Donald Tramp osy baǵytta málimdeme jasady. Oqıǵanyń qalaı órbıtini jáne yqtımal stsenarııler týraly tolyq taldaý Kazinform halyqaralyq sholýshysynyń materıalynan oqı alasyz.