Eýropalyq avıatsııa retteýshisi Iran, Irak jáne Lıvan áýe keńistigin paıdalanbaýǵa keńes berdi
ASTANA. KAZINFORM – Eýropalyq avıatsııalyq qaýipsizdik agenttigi (EASA) Taıaý Shyǵystaǵy shıeleniske baılanysty áýe kompanııalaryna Iran, Irak jáne Lıvan áýe keńistiginde ushýdan bas tartýdy usyndy, dep habarlaıdy Kazinform.
EASA sársenbi kúni jarııalaǵan bıýlletende bul usynystyń 31 tamyzǵa deıin kúshinde bolatyny aıtylǵan.
Agenttik málimetinshe, sheshim AQSh pen Iran arasyndaǵy ózara soqqylardan keıin aımaqtaǵy shıelenistiń joǵary deńgeıde saqtalýyna jáne áskerı qaqtyǵystyń odan ári órshý qaýpine baılanysty qabyldandy.
– Qoldanystaǵy atysty toqtatý rejımine qaramastan, jaǵdaı turaqsyz kúıinde qalyp otyr. Eger kelisim buzylsa, Iran áýe keńistigi tikeleı qaýip-qaterge ushyraýy múmkin, – delingen EASA baǵalaýynda.
Jańa usynym Iran Islam revolıýtsııasy saqshylar korpýsynyń Bahreın men Kýveıttegi amerıkalyq áskerı nysandarǵa soqqy jasaǵany týraly málimdemelerinen, sondaı-aq AQSh-tyń Iran aýmaǵyna jasaǵan birqatar shabýylynan keıin jarııalandy.
Aımaqtaǵy jaǵdaı Ormýz buǵazyndaǵy kommertsııalyq kemelerge jasalǵan shabýyldardan keıin de kúrdelene tústi.
Buǵan deıin 8 shildege deıin kúshinde bolǵan EASA bıýlleteni Lıvanǵa da qatysty bolǵan. Onda áýe kompanııalaryna Bahreın, Kýveıt, Izraıl, Iordanııa, Qatar, Oman, Birikken Arab Ámirlikteri jáne Saýd Arabııasy áýe keńistiginde ushý kezinde erekshe saqtyq tanytý usynylǵan.
Aıta keteıik, EO jańa ereje engizdi, endi otbasylar ushaqta qatar otyra alady.
