Eýropaǵa júk jetkizýdiń qosymsha baǵdary: Júrgizýshilerge vızasyz rejım beriledi
ASTANA. KAZINFORM — QR Kólik mınıstrligi Qazaqstannan avtokólikpen Eýropaǵa júk jetkizý úshin balama baǵdar qarastyrý máselesi boıynsha túsinik berdi.
— Reseı men Belarýsti aınalyp ótetin balamaly mashrýtty pysyqtaý jumystary da júrip jatyr. Bul balamaly baǵdar Túrikmenstan, Iran, Túrkııa aýmaqtary arqyly odan ári Eýropa memleketterine shyǵýdy kózdeıdi. Bul baǵytta tasymaldardy jeńildetý maqsatynda Mınıstrlik Túrikmenstanmen avtotasymaldarǵa ruqsatsyz júıe ornatý máselesin pysyqtap, 2024 jylǵy 10 qazanda Qazaqstan men Túrikmenstan arasyndaǵy halyqaralyq avtomobıl tasymaldary jónindegi úkimetaralyq kelisimge ózgerister engizý týraly hattamaǵa qol qoıdy (qazirgi kezde Hattamany ratıfıkatsııalaý jumystary atqarylyp otyr). Sondaı-aq qazirgi ýaqytta Qazaqstan men Túrikmenstan arasynda júrgizýshiler úshin vızasyz rejım ornatý máselesi pysyqtalyp jatyr, — delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, Iranmen avtokólikpen júk tasymaldaryna jyl saıyn jetkilikti kólemde ruqsat blankilerimen almasý júrgiziledi jáne júrgizýshiler 15 kúnge deıin vızadan bosatylǵan.
— Túrkııamen de jyl saıyn avtokólikpen júk tasymaldaryna jetkilikti kólemde ruqsat blankilerimen almasý júrgiziledi jáne azamattarǵa vıza talap etilmeıdi, — dep atalyp ótken Kólik mınıstrligi málimetinde.
2023 jyldyń aıaǵynda Kólik mınıstrliginiń ókilderi Qazaqstan avtokólikpen júk tasymaldaý úshin Reseı men Belarýsti aınalyp ótetin balama baǵdar qarastyryp jatqany týraly habarlaǵan edi.
Byltyr kúzde Qazaqstan men Túrikmenstan arasynda «ruqsatsyz» júk tasymaldaý júıesi engiziletini habarlandy.