Eýropaǵa zańsyz eksport: Jetisýda balyq mańyndaǵy bylyq anyqtaldy

ASTANA. KAZINFORM — Jetisý oblysynyń tabıǵat qorǵaý prokýratýrasy balyq sharýashylyǵyndaǵy zańbuzýshylyqtardy tekserip, iri kólemdegi kontrabandalyq áreketterdi anyqtady.

Tekserý barysynda birqatar kásiporynnyń balyq ónimderin Eýropa elderine zańsyz eksporttap kelgeni belgili boldy. Bul kompanııalar 20-dan astam enshiles (ıaǵnı, ózderine qarasty) fırmalar ashyp, solar arqyly ónimdi shetelge shyǵarǵan. Biraq sol enshiles kompanııalardyń zań boıynsha balyq aýlaýǵa quqyǵy bolmaǵan — olarda sý qoımalary bekitilmegen, balyq aýlaýǵa kvotasy joq, eksportqa ruqsattary da bolmaǵan.

— Mysaly, bir ǵana kompanııaǵa 270 tonna balyq aýlaýǵa ruqsat berilgen, biraq ol 4 920 tonna balyq eksporttaǵan — bul ruqsat etilgen kólemnen 18 ese kóp. Onyń 2 096 tonnasyn enshiles kompanııalar zańsyz jolmen syrtqa shyǵarǵan. Memlekettik organnyń esepteýinshe, osyndaı zańsyz áreketterden memleketke kelgen shyǵyn 80 mıllıard teńgeden asqan. Qazir bul faktiler boıynsha ekonomıkalyq kontrabanda baby boıynsha qylmystyq tergeý júrgizilip jatyr, — delingen habarlamada.

Osydan buryn Jetisýda sýbsıdııaǵa bólingen aqshany qumar oıynǵa jumsap jibergeni anyqtaldy.