Eýropaǵa vıza rejımin jeńildetý: jaqynda Astanada kelissóz bolady
ASTANA. KAZINFORM — Eýropaǵa vıza rejımin jeńildetýge qatysty negizgi tásilder men basymdyqtar aıqyndaldy.
- Qazaqstan Respýblıkasy Syrtqy ister mınıstrligi vızalyq saıasatty yryqtandyrý, sondaı-aq halyqaralyq iskerlik jáne kóshi-qon baılanystaryn keńeıtý baǵytyndaǵy jumystardy júıeli túrde júrgizip keledi. Qazirgi ýaqytta Qazaqstan 39 elmen vızasyz rejım ornatqan, - delingen QR SІM baspasóz qyzmetiniń Kazinform agenttigine bergen jaýabynda.
Sonymen qatar vedomstvo Eýropaǵa vıza rejımin jeńildetý boıynsha kelissózge qatysty túsinik berdi.
- 2025 jylǵy jeltoqsanda Brıýssel qalasynda Qazaqstan Respýblıkasy men Eýropa odaǵy arasyndaǵy vızalardy berý tártibin jeńildetý jáne readmıssııa týraly kelisimder boıynsha resmı kelissózderdiń birinshi raýndy ótti. Kelissózder barysynda taraptar kelisimder jobalaryna qatysty mazmundy pikir almasyp, negizgi tásilder men basymdyqtardy aıqyndady. Taraptar ózara is-qımyldy jalǵastyrýǵa ýaǵdalasyp, kelesi konsýltatsııalardy jaqyn arada Astana qalasynda ótkizý josparlandy, - dep atalyp ótken mınıstrlik aqparatynda.
Eske salsaq, Qazaqstanǵa 87 eldiń azamaty vızasyz kele alady, taǵy 107 eldiń azamaty elektrondy vızamen kire alady.
Aıta keteıik, EO úshinshi eldermen vızasyz saıahatqa qatysty erejelerdi qatańdatty.