Eýropaǵa vıza rejımin jeńildetý boıynsha kelissózdiń ekinshi raýndy Astanada ótedi

ASTANA. KAZINFORM – QR Syrtqy ister mınıstrliginiń resmı ókili Aıbek Smadııarov Eýropaǵa vıza rejımin jeńildetý boıynsha kelissózdiń alǵashqy raýndty qalaı ótkenin aıtyp berdi. 

Bıyl 1 jeltoqsanda QR Syrtqy ister mınıstri Ermek Kósherbaev pen Eýropalyq odaqtyń syrtqy ister jáne qaýipsizdik saıasaty jónindegi joǵary ókili Kaııa Kallas tóraǵalyǵymen Qazaqstan – Eýropalyq odaq yntymaqtastyq keńesiniń 22-otyrysy ótti.

Taraptar energetıka, kólik, logıstıka, tsıfrlandyrý, azamattyq avıatsııa, vızalyq rejımdi jeńildetý jáne strategııalyq mańyzdy shıkizatty óndirý men paıdalaný salasynda ózara is-qımyl máseleleri boıynsha mazmundy pikir almasty. Otyrys barysynda vızalyq rejımdi jeńildetý jóninde kelisimder boıynsha kelissózderdiń bastalǵany jarııalandy. 

Bul Qazaqstan men EO arasyndaǵy joǵary deńgeıdegi senimdi kórsetetin Keńeıtilgen seriktestik pen yntymaqtastyq týraly kelisimge qol qoıýdyń on jyldyǵymen tuspa tus kelgen mańyzdy qadam.

Kelesi kúni QR Syrtqy ister mınıstri Álibek Baqaev pen Eýropalyq komıssııanyń Mıgratsııa jáne ishki ister jónindegi bas dırektorat dırektorynyń orynbasary Iohanes Lýhner teń tóraǵalyǵymen resmı kelissózderdiń birinshi raýndy bastaldy. Taraptar óz tásilerin tanystyryp, negizgi baǵyttardy kelisip, zamanaýı quqyqtyq baza qalyptastyrýǵa daıyn ekendigin rastady. 

Bul baza ekijaqty saparlardy jeńildetýge, gýmanıtarlyq baılanystardy keńeıtýge jáne halyqaralyq qatynastar arasyndaǵy jaqyndastyqty nyǵaıtýǵa baǵyttalady.

Kelissózderdiń kelesi raýndy 2026 jyly Astanada ótkiziledi dep josparlanǵan.