Eýropaǵa vıza rejımin jeńildetýge qoldaý suradyq - SІM

ASTANA. QazAqparat – QR Premer-Mınıstriniń orynbasary – Syrtqy ister mınıstri Murat Nurtileý shveıtsarııalyq deregatsııadan Eýropaǵa vıza rejımin jeńildetýde qoldaý kórsetýdi surady, dep habarlaıdy QazAqparat.

Búgin vedomstvo basshysy Qazaqstanǵa resmı saparmen kelgen Shveıtsarııa Syrtqy ister federaldyq departamentiniń basshysy Inıatsıo Kassıspen kezdesti.

«Kezdesý barysynda týrıstik salada jarnamalyq naýqandardy uıymdastyrý arqyly birlesken is-sharalardy júzege asyrýdyń mańyzdylyǵyn atap óttik. Eki el azamattary arasyndaǵy baılanystardy keńeıtý joldaryn da ortaǵa saldym. Kóptegen eýropalyqtarmen qatar, Shveıtsarııa azamattary da bes jyldan astam ýaqyttan beri Qazaqstanǵa týrıstik nemese iskerlik vıza rásimdemeı kele alady. Osyǵan baılanysty, Kassıs myrzadan Qazaqstan azamattary úshin vızalyq rejımdi jeńildetý jónindegi resmı konsýltatsııalarda qoldaý kórsetýdi suradym», - dedi Murat Nurtileý elordada ótken brıfıngte.

Syrtqy ister mınıstri qos eldiń múddesin qamtıtyn salalardaǵy ekijaqty qarym-qatynastardyń bolashaǵy zor degen ortaq oıǵa kelgenderin atap ótti.

«Qos taraptyń biregeı maqsaty – Astana men Bern arasyndaǵy san-qyrly áriptestik órisin keńeıtý baǵytynda nyq qadamdar jasalatynyna kúmánim joq. Osy kezdesýdiń qorytyndysy eki el arasyndaǵy baılanystardy kúsheıtýge qosymsha serpin beretinine senimdimin», - dedi M. Nurtileý.

Buǵan deıin I. Kassıs Shveıtsarııanyń halyqaralyq sý bólý máselesinde Qazaqstanǵa járdem kórsetýge daıyn ekenin aıtqan edi.

Sondaı-aq, Shveıtsarııanyń Qazaqstan ekonomıkasyna salǵan ınvestıtsııasy 32,6 mlrd dollardan asty.