Eýropaǵa tasymaldanatyn júktiń 80 paıyzy Qazaqstan arqyly ótedi – Roman Sklıar
«Qazirgi geosaıası ahýaldy eskersek, jańa kólik-logıstıkalyq baǵyttardyń strategııalyq mańyzy artyp tur. Bul ózara tasymal tizbegi men óndiristerdi senimdi ári ártarapty etý úshin qajet. Qytaı men Ortalyq Azııadan Eýropaǵa baǵyttalǵan taýardyń 80%-dan astamy Qazaqstan arqyly tasymaldanady. Bul turǵyda qurlyqtaǵy saýda kartasynda Transkaspıı halyqaralyq kólik marshrýtynyń mańyzy artyp otyr. Bul baǵytpen tasymaldanyp jatqan júk aınalymynyń ulǵaıǵany kóńil qýantady. Byltyr júk aýystyryp tıeý kólemi 2 ese ósip, 1,7 mln tonnaǵa jetken. Al bıyl alǵashqy 5 aıda júk aǵyny 64% artty. Orta eseppen, bıyl bul baǵyttaǵy júk aınalymynyń kólemin 10 mln tonnaǵa deıin jetkizbekpiz. Qazaqstan óz tarapynan nemis jáne eýropalyq áriptesterine porttardyń áleýetin barynsha paıdalanýǵa múmkindik usynýǵa daıyn», - dedi Roman Sklıar.
Birinshi vıtse-premer eki el arasnyda balama energetıka salasyndaǵy áriptestikti damyta alatynyn atap ótti.
«Balamaly energetıka men jasyl ekonomıka salasyndaǵy yntymaqtastyqtyń áleýeti zor. Biz 2030 jylǵa qaraı eldiń energııa balansyndaǵy jańartylatyn kózderdiń úlesin 5%-dan 15% deıin ulǵaıtýǵa nıettimiz. Osy maqsatta tıisti ulttyq strategııa qabyldanyp, balamaly energııa kózderine kezeń-kezeńimen kóshý kózdelip otyr. Energetıkalyq tıimdilikti arttyrý baǵytynda da shara qabyldap jatyrmyz», - dedi Úkimet basshysynyń birinshi orynbasary.
