Eýropaǵa qajet 34 shıkizattyń 21-i Qazaqstanda óndiriledi
ASTANA. KAZINFORM — Qasym-Jomart Toqaev Qazaqstan-Belgııa iskerlik keńesiniń tórtinshi otyrysynda energetıka jáne munaı hımııasy salalaryndaǵy yntymaqtastyq perspektıvasyna basa nazar aýdardy, dep habarlaıdy Aqordanyń baspasóz qyzmeti.
— Qazaqstan eýropalyq naryqqa turaqty túrde munaı jetkizedi. Sonymen qatar jańartylatyn qýat kózderi, energııa tıimdiligin arttyrý, ónerkásipti dekarbonızatsııalaý jáne sýtegi óndirisi salalaryndaǵy yntymaqtastyqtyń áleýeti zor. Belgııa kompanııalaryn shıkizatty tereń óńdeý, hımııa ónerkásibi jáne qosylǵan quny joǵary polımer ónimderin shyǵarý baǵyttarynda birlesken jobalardy iske asyrýǵa shaqyramyn, — dedi Memleket basshysy.
Prezıdent jasyl energetıkaǵa kóshý jáne tsıfrlyq ekonomıkany damytý asa mańyzdy mıneraldar salasyndaǵy óndiristik kooperatsııa múmkindikterine jol ashatynyna toqtaldy.
Qasym-Jomart Toqaev Korol Fılıpptiń memlekettik sapary aıasynda asa mańyzdy mıneraldar boıynsha Qazaqstan-Belgııa dóńgelek ústeli uıymdastyrylǵanyn atap ótti.
— Elimiz Eýropa ónerkásibi úshin aýadaı qajet 34 shıkizat túriniń 21-in óndiredi. Sonymen qatar Belgııaǵa tıtan men molıbden ónimderin tasymaldaıdy. Bizdiń resýrs áleýetimiz ben Belgııanyń ınvestıtsııasyn, tehnologııasy men bilim-biligin ushtastyra otyryp, osy óte mańyzdy salada strategııalyq seriktestik qura alamyz. Búgingi is-sharanyń nátıjesi naqty ınvestıtsııalyq jáne tehnologııalyq jobalarǵa ulasady dep úmittenemin. Maqsatymyz — otandyq óńdeý ónerkásibin órkendetip, qosylǵan quny joǵary taýar shyǵarý. John Cockerill jáne Qarmet kompanııalary myryshtalǵan bolat pen qorǵanysh jabyndaryn óndirý boıynsha seriktestikti jolǵa qoımaq. Belgııalyq áriptesterdiń geologııalyq barlaý, shıkizat jáne metall óńdeý jobalaryna qatysýyn quptaımyz, — dedi Prezıdent.
Budan buryn Prezıdent Qazaqstannyń eki portyn Belgııanyń iri logıstıkalyq ortalyǵymen baılanystyrýdy usyndy.
