Eýropaǵa Qazaqstannyń maıly daqyldary kerek
ASTANA. QazAqparat - Eýropa elderi Qazaqstannyń maıly daqyldary men bıdaıyna suranysty arttyrdy, dep habarlaıdy QazAqparat.
«AÓK ónimderiniń Eýropa elderine eksportynyń ósýin atap ótý qajet. Mysaly, Belgııaǵa AÓK ónimderin eksporttaý 1,2 esege, Germanııaǵa -1,5 ese, Italııaǵa - 2,1 ese, Latvııaǵa - 1,7 ese, Nıderlandyǵa - 1,5 ese, Chehııaǵa 2,8 ese ósti. Atap aıtqanda, Eýropalyq elderge maıly daqyldardyń, bıdaı, keptirilgen burshaq, kókónister eksporty ulǵaıdy», - dedi QR Aýyl sharýashylyǵy birinshi vıtse-mınıstri Qaırat Aıtýǵanov Úkimet otyrysynda.
Osy oraıda ol zyǵyr tuqymdaryn Belgııaǵa eksporttaý 1,4 esege, Germanııaǵa - 1,5 ese, Chehııaǵa - 3,3 esege, Latvııaǵa - 1,9 ese, sondaı-aq Italııaǵa bıdaı eksporty 2,4 esege artqanyn atap ótti.
«Atap aıtqanda, ótken jyldyń sáıkes kezeńimen salystyrǵanda Túrkııaǵa eksport kólemi eki ese ósti, ıaǵnı 29 mln AQSh dollarynan 57 mln AQSh dollaryna deıin», -dedi Qaırat Aıtýǵanov.
