Eýropaǵa Qazaqstan arqyly 100 myń konteıner tasymaldandy
ASTANA. QazAqparat - Bıylǵy 8 aıda Qytaıdan Qazaqstan aýmaǵy arqyly Eýropa elderine tasymaldar 100 myń konteınerge jetti. Bul týraly QR IDM Kólik komıteti tóraǵasynyń orynbasary Dmıtrıı Potlov málim etti, dep habarlaıdy QazAqparat.
«Sońǵy 2 jyl ishinde Qytaı Halyq Respýblıkasynan Qazaqstan aýmaǵy arqyly Eýropa elderine konteınerlik tasymaldar kólemi 2 ese artty. Bıylǵy 8 aıda onyń kólemi 100 myń konteınerge jetti. Salystyra ketsek, 2016 jyldyń 8 aıy ishinde 56 myń konteıner tasymaldanǵan bolatyn», - deıdi D. Potlov Investıtsııalar jáne damý mınıstrliginde ótken baspasóz máslıhatynda.
Vedomstvo málimetine qaraǵanda, jalpy alǵanda tasymaldar kólemin arttyrý úshin konteınerlerdi tasymaldaýǵa arnalǵan 17 myń platforma vagondaryn satyp alý qajet.
«Qazirgi kezde konteınerlik tasymaldar úshin qosymsha fıtıngtik platformalardy alý máselesi qarastyrylyp jatyr. Shamamen 10 myńnan asta platforma qajet. Alaıda bul vagondardy birden satyp alynbaıdy, ıaǵnı olar 2020 jylǵa deıin kezeń-kezeńmen jetkiziledi», - dep túsindirdi QR IDM ókili.
Belgili bolǵandaı, tranzıttik konteınerlik tasymaldar úshin 3 103 vagon shyǵarý jóninde sharttar bekitildi. Onyń ishinde 1 029-y paıdalanýǵa berildi.
