Eýropaǵa bal eksporttaýǵa ruqsat aldyq — mınıstr
ASTANA. KAZINFORM — Qazaqstan Eýropa elderine bal eksporttaýǵa ruqsat aldy. Aýyl sharýashylyǵy mınıstri Aıdarbek Saparov Úkimet otyrysynda osyndaı málimet aıtty.
— Búginde Eýropa elderiniń tiziliminde 62 qazaqstandyq kásiporyn tirkelgen. Bıyl Qazaqstan EO elderine bal eksporttaýǵa resmı ruqsat aldy. Sondaı-aq akvakýltýra, jylqy eti jáne sút ónimderin eksporttaýǵa jol ashý baǵytynda jumys júrgizilip jatyr, — dedi vedomstvo basshysy.
Onyń sózinshe, qazir eldegi 2 649 kásiporyn Qytaıǵa ónim eksporttap otyr.
— 2025 jyly Qytaımen qus etine qatysty veterınarııalyq talaptardy belgileıtin hattamaǵa qol qoıyldy. Grýzııamen et baǵytyndaǵy iri qara men qoı eksporty boıynsha, Iranmen tuıaqty mal júniniń eksporty boıynsha veterınarııalyq sertıfıkattarǵa qol qoıyldy. Túrkııa, Aýǵanstan jáne Pákistanmen naryqtardy keńeıtý boıynsha kelissózder jalǵasyp jatyr, — dedi Aıdarbek Saparov.
Buǵan deıin Qazaqstanda aýyl sharýashylyǵyn tsıfrlandyrý qalaı júrip jatqanyna sholý jasaǵan edik.