Eýropaǵa baǵyt alǵan ózbekstandyq ushaqtar Reseıdi aınalyp ótip jatyr

TAShKENT. KAZINFORM – Uzbekistan Airways kompanııasynyń ushaqtary 20 qańtardan beri Reseıdi aınalyp ótip, Eýropaǵa reıs oryndap jatyr, dep habarlaıdy Kazinform agenttiginiń menshikti tilshisi.  

Bul týraly BAQ ókilderiniń qatysýymen ótken baspasóz máslıhatynda Uzbekistan Airways ulttyq kompanııasynyń tóraǵasy Shýhrat Hýdaıkýlov aıtty.

10 qańtarda Eýropalyq avıatsııalyq qaýipsizdik agenttigi Reseıdiń Máskeý, Sankt-Peterbýrg, Samara jáne Ekaterınbýrg qalalaryna reıs jasaýdy shekteý qajettigin málimdegen bolatyn.

- Buryn bizdiń Eýropaǵa baǵyttalǵan barlyq reıster Reseı arqyly ótetin. Alaıda, 20 qańtardan bastap ushý baǵytyn tolyq ózgerttik. Qazir reıster Ázerbaıjan men Túrkııa arqyly oryndalyp jatyr. Bul óz kezeginde ushý ýaqytynyń uzarýyna jáne qosymsha shyǵyndarǵa ákeldi, - dedi Shýhrat Hýdaıkýlov.

Onyń aıtýynsha, reısti oryndaýdaǵy qıyndyqtarǵa qaramastan, Uzbekistan Airways bılet baǵasyn kótermegen. Shyǵyndar ulttyq kompanııa esebinen ótelip jatyr.

Aıta keteıik, byltyr 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn.

Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.

Qaıǵyly jaǵdaıdan keıin Qazaqstan, Ázerbaıjan jáne Reseıde qylmystyq is qozǵaldy.