Eýropaǵa ashylǵan tereze

Kezdesý barysynda saýda-ekonomıkalyq, ınvestıtsııa, aýyl sharýashylyǵy, kólik-tranzıt, mádenı-gýmanıtarlyq salalarmen qatar, halyqaralyq saıasattaǵy ózekti máseleler sóz boldy, dep jazady «Ana tili» gazeti.

Qazaqstan tarapynan Syrtqy ister mınıstri Erlan Ydyrysov, Premer-mınıstrdiń orynbasary - Aýyl sharýashylyǵy mınıstri Asqar Myrzahmetov, «Samuryq-Qazyna» Ulttyq ál-aýqat qory» AQ Basqarma tóraǵasy Ómirzaq Shókeev, Investıtsııalar jáne damý mınıstri Jeńis Qasymbek jáne taǵy basqa da delegatsııa ókilderi qatysqan keńeıtilgen jıynda birneshe másele talqylanyp, eki eldiń yntymaqtastyǵyn arttyrý jolynda kelissózder júrgizildi.
Eki eldiń Memleket basshylary Qazaq­stan men Polsha arasyndaǵy Ekono­mıkalyq yntymaqtastyq týraly deklaratsııany qabyldap, eki eldiń Syrtqy ister vedomstvolarynyń basshylary Qazaqstan Respýblıkasynyń Úkimeti men Polsha Úkimetiniń arasyn­daǵy Adamdardyń readmıssııasy týraly kelisimge qol qoıdy. Sonymen qatar Aýyl sharýashylyǵy salasyndaǵy yntymaqtastyq týraly Úkimetaralyq, Qazaqstannyń Damý Banki men Polsha Ulttyq ekonomıka banki arasyndaǵy negizdemelik máni bar mańyzdy qujattarǵa qol qoıyldy.
Elbasy N.Nazarbaev Polsha Respýb­lıkasy Senatynyń tóraǵasy Stanıslav Karchaevksıımen, osy eldiń Premer-mınıstri Beata Shıdlomen kezdesip, issapar barysynda jasalǵan kelisimshart negizinde jumystardy qarqyndy jalǵastyrý qajettigin tilge tıek etti.
Kezdesý barysynda Memleket basshysy N.Nazarbaev «Bizdiń elderimizdi ortaq tarıh baılanystyrady. Biz Reseıdiń eki jaǵynda ornalasqan elmiz. Polsha - Qazaqstannyń Eýropadaǵy eń mańyzdy, eń jaqyn áriptesi. Eki eldiń arasynda eki jaqqa da paıdaly kóp nárseler bar. Eń birinshi, ol ekonomıkalyq qatynas. Biz Prezıdent myrzamen jeke otyryp saıası jaǵdaılardy da, ekonomıkalyq máselelerdi de talqyladyq» deı kele, aldaǵy ótetin bıznes-forýmnan kóp úmit kútetindigin jetkizdi.
Budan keıin QR Prezıdenti N.Nazarbaev pen Polsha Prezıdenti A.Dýda eki eldiń 400-den astam kásip­keri kelgen Qazaqstan-Polsha bıznes-forýmynyń tanystyrylymyna qatys­ty. Qazaqstannyń Polshaǵa eksportynda energııa resýrstary, shıkizat jáne hımııa, kómir ónerkásibi, qara metallýrgııa, astyq pen maqta, t.b. aýyl sharýa­shylyǵy ónimderi basym bolsa, Polshadan Qazaqstanǵa jetkiziletin negizgi ımport túrleri - elektrlik-tur­mys­tyq qurylǵylar men jabdyqtar, hımııa ónerkásibi men aýyl sharýashylyǵy ónimderi, azyq-túlik taýarlary, jıhaz, t.b. ekendigin atap ótýimiz qajet.
Elbasy óz sózinde Qazaqstanda polıak kompanııalarynyń qatysýymen quny 100 mln dollar bolatyn úsh jobanyń júzege asyrylyp jatqandyǵyn, eli­mizde 100-den astam kásiporynnyń jumys júrgizip jatqandyǵyn atap ótti. Sondaı-aq Qazaqstandy polıaktardyń shaǵyn jáne orta kásipkerlikti damytý tájirıbesi qyzyqtyratynyna toqtalyp, memleketimizde shaǵyn jáne orta bız­nesti damytýshy azamattarǵa qoldaý kór­setiletinin jetkizdi.
«Kásipkerlerge kómektesý úshin bızneske qolaıly jaǵdaılar týǵyzýǵa baǵyttalǵan ulttyq baǵdarlamalar júzege asyrylýda. Kásipkerlerge ataýly kómek kórsetetin «Damý» atty kásipkerlikti damytýdyń arnaýly qory jumys isteıdi. Bizdi sizderdiń agroónerkásip keshenin damytý, aýyl sharýashylyǵy ónimderin óńdeý, kólik jáne logıstıka, energetıka, farmatsevtıka salalaryndaǵy tájirıbelerińiz qyzyqtyrady. Men eki eldiń bıznes ókilderin qyzyqtyrýy múmkin birneshe salany ǵana atap óttim. Bul rette Polsha úkimeti qabyldaǵan Perspektıvaly naryqtardy ıgerýdiń 2013-2016 jyldarǵa arnalǵan baǵdarlamasynyń áleýetin belsendirek paıdalaný qajet. Onda Qazaqstan Brazılııa, Kanada, Túrkııa jáne Aljırmen birge perspektıvaly bes ekonomıkalyq naryqtyń biri retinde kórsetilgen. Budan bólek, Polshada bizdiń elmen birqatar saladaǵy yntymaqtastyq týraly arnaýly baǵdarlamalar júzege asyrylýda» dedi N.Nazarbaev.
Іssapar barysynda Memleket basshysy N.Nazarbaev Polshanyń Krakov, Varshava, Poznan sekildi iri qalalarynda bilim alyp jatqan qazaqstandyq jastarmen kezdesip, olardyń alǵan bilimderiniń nátıjesin týǵan jerlerinde kórsetýge, elimizdiń damyp-kórkeıýine jumsaýyna shaqyrdy.
Kezdesý sońynda Elbasy Nursultan Ábishuly Polshaǵa jasaǵan sapary jaıynda BAQ ókilderine arnaıy brıfıng ótkizip, jýrnalısterdiń saýaldaryna jaýap berdi. Polshany Qazaqstan úshin Eýropaǵa ashylǵan tereze dep sanaıtynyn alǵa tartty. Eýropadaǵy iri memleket shaǵyn jáne orta bıznesti jedel túrde jolǵa qoıǵandyǵy eldegi jetis­tikterdiń biri ekendigin atap ótip, osy salada tájirıbe almasýǵa sha­qyrdy. Sondaı-aq farmatsevtıka óndirisi, qurylys salasyna kóńil aýdaryp, eki el arasyndaǵy kólik joldaryn qamtamasyz etý qajet­tigin, áýe qatynasy joldaryn ashýdyń mańyz­dylyǵyna toqtaldy. Eki el arasyndaǵy yn­tymaqtastyq birikken jumystardyń nátıjesi ekendigi aıqyn.
***
Polsha memleketinen keıin Elbasy N.Nazarbaev Belgrad qalasyna issaparmen keldi. Sapar aıasynda Serbııa Prezıdenti Tomıslav Nıkolıchpen birqatar kelissózder júrgizip, eki jaqty qujattarǵa qol qoıý kózdelgen. Sonymen qatar Qazaqstan basshysy Serbııa Premer-mınıstri Aleksandr Výchıchpen, Serbııa Patrıarhy Irıneımen kezdesip, Belgrad qalasyndaǵy Jambyl Jabaevtyń eskertkishiniń ashylý saltanatyna qatysady dep josparlanǵan.