Eýropadan keletin reısterde bagaj berý keshigetini eskertildi

NUR-SULTAN. QazAqparat – Qazaqstandyq Air Astana áýe kompanııasy eýropalyq áýejaılardan keletin reısterde bagaj berýdiń keshigetinin eskertti, dep habarlaıdy QazAqparat Air Astana baspasóz qyzmetine silteme jasap.

Jazǵy navıgatsııanyń bastalýymen Eýropanyń áýe aılaqtary qyzmetkerler jetispeýshiligine tap boldy, óıtkeni olar pandemııa kezinde qysqarǵan bolatyn jáne reısterge qyzmet kórsetýde qıyndyqtar týyndady.

Bul qıyndyqtar jolaýshylarǵa qyzmet kórsetýge de, bagajdy óńdeýge de baılanysty.

Saldarynan sońǵy birneshe aptada túrli avıakompanııalardyń júzdegen jolaýshysy bagajyn birneshe saǵat kútýge májbúr boldy.

Al keıbir saıahatshylar áli ala almaı keledi. Mysaly, Frankfýrt áýejaıynda shamamen 12 myń júk áli berilgen joq, onyń arasynda qazaqstandyq avıakompanııa jolaýshylarynyń bagajdary da bar.

«Áýe kompanııasy eýropalyq áýejaılardan, atap aıtqanda Frankfýrt áýejaıynan keletin jolaýshylardan bagaj kútýde túsinistik pen tózimdilik tanytýdy suraıdy. Júkti tez arada jetkizý úshin bar kúshimizdi salamyz. Bagaj máselesi boıynsha ótinishti help.airastana.com portalyna jazýǵa bolady. Air Astana eýropalyq áýejaılardaǵy fors-major saldarynan týyndaǵan qolaısyzdyq úshin keshirim suraıdy», - delingen baspasóz qyzmetiniń habarlamasynda.