Eýropadaǵy satýshysyz dúkender Qazaqstanda da ashyldy - Bektenov
ASTANA. QazAqparat - Sońǵy úsh aıda Qazaqstanda 3 myńnan astam adaldyq dúkeni ashyldy, dep habarlaıdy QazAqparat.
Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov aıtty.
«Sybaılas jemqorlyq deńgeıin azaıtýda qoǵamdyq sanany ózgertý mańyzdy. Bul baǵytta satýshysy joq Adaldyq dúkenderiniń ashylýy úlken jańalyq boldy. Dúkenge esh baqylaý jasalmaıdy jáne taýar alǵan adam da aqshany óz erkimen tólep ketýi tıis. Osylaısha adamdardyń boıynda moraldyq qasıetter damıdy, parasattylyq qalypty ómir saltyna aınalady», - dedi Oljas Bektenov Sybaılas jemqorlyqqa qarsy Ulttyq bıýroda ótken brıfıngte.
Ol Eýropa elderindegi adal saýda týraly beınerolıktiń Qazaqstanda keńinen talqylanǵanyn eske saldy.
«Ótken jyly WhatsApp» jelisinde eýropalyqtardyń gúl alqabynan qajetti gúldi alyp, baqylaý men kamera bolmasa da tıisti aqshany qaldyryp ketetini qyzý talqylandy. Qazaqstanda mundaı tájirıbe júzege aspaıdy dep kesip aıtty. Adaldyq dúkenderi ashylǵanda da senbegender tabyldy. Halyqtyń mundaı júıege daıyn emestigin jetkizdi. Nátıjesinde 3 aıda elimizde 3 455 adaldyq dúkeni ashyldy», - dedi O. Bektenov.
Dúkender oqý oryndary men memlekettik organdarda kóptep ashylǵan.
«Tipti bul bastamaǵa qaýippen qaraǵan kásipkerler kózqarasyn ózgertti. Almaty metrosynda «Adaldyq týrnıketi» ashyldy. Nátıjesinde, oń ózgeristerge qoǵamymyzdyń daıyn ekenin, Qazaqstannyń eshbir elden kem túspeıtinin kórip otyrmyz», - dedi Oljas Bektenov.
