Eýropadaǵy árbir úshinshi áıel zorlyq-zombylyqqa tap bolǵan – Mogerını
NUR-SULTAN. QazAqparat – Eýropadaǵy árbir úshinshi áıel zorlyq-zombylyqqa tap bolǵan. Bul týraly EO joǵary ókili Federıka Mogerını 25 qarashada atalyp ótiletin Halyqaralyq áıelderge qatysty zorlyq-zombylyqty joıý kúni qarsańynda málim etti, dep habarlaıdy Eýrokomıssııa.
«Áıelderge qatysty zorlyq-zombylyq barlyq jerde kezdesedi, budan qashyp qutylý múmkin emes, tipti úıde de. Sebebi, áıelder zorlyq-zombylyqqa úıde de, jumysta da, mektepte nemese ýnıversıtette de, kóshede de, ınternette de – kıbernetıkalyq zorlyq-zombylyqqa nemese jek kórýshilikke tap bolýy múmkin», - dep atap ótti Mogerını.
Onyń aıtýynsha, bul máseleniń aýqymy barlyǵyn alańdatýda. Sebebi, Eýropadaǵy árbir úshinshi áıel dene nemese seksýaldyq sıpattaǵy zorlyq-zombylyqqa tap bolǵan. Seksýaldyq maqsattaǵy adam saýdasynyń barlyq qurbandary - áıelder nemese qyzdar.
EO Joǵarǵy ókili atap ótkendeı, Eýroodaq seriktestiktermen damýdy jáne bilim berýdi qoldaý boıynsha ınstıtýttar men zańnamalyq bazany nyǵaıtý, áıelderge qatysty zorlyq-zombylyqtyń sebepterin joıý jáne olardyń áleýmettik rólin kóterý jumystaryn jalǵastyrady.
