Eýropadaǵy aptap ystyq atom stansalaryna qaýip tóndirdi
NUR-SULTAN. QazAqparat – Eýropa elderinde ornaǵan aptap ystyq orman órtterine jáne ózen deńgeıiniń túsýine alyp kelip qana qoımaı, birqatar atom stansalarynyń reaktorlarynyń toqtaýyna sebepshi boldy, dep habarlaıdy «QazAqparat» HAA Bloomberg-ke silteme jasap.
Osylaısha, aýa raıynyń saldarynan memlekettiń elektr qýatynyń 3/4 bóligin qamtıtyn jáne AES-tyń 59 elektr blogyn basqaratyn frantsııalyq Electricite de France kompanııasyna óndirisin azaıtýǵa týra keldi. Eki reaktordyń jumysy toqtatyldy, al jaqyn ýaqytta taǵy ekeýiniń qýatyn jartylaı azaıtý josparlanǵan, sebebi ózen sýlarynyń qyzǵany sonshalyq, stansany sýytýǵa jaramaıdy.
Bul jaǵdaı jaryq baǵasynyń kúrt kóterilýine alyp keldi. Óz kezeginde Electricite de France qyzmetkerleri atom stansalaryn budan da ystyq aýa raıy kezinde jumys isteýge daıyndaıtyndaryn málim etti.
