Eýropadaǵy taǵy bir tonaý: Belgııada Napoleonnyń júzigi urlandy

AQTÓBE. KAZINFORM — Belgııanyń Jenappe qalasyndaǵy Napoleonnyń sońǵy rezıdentsııasynda urlyq boldy. Kollektsııadaǵy birneshe zat, sonyń ishinde frantsýz ımperatoryna tıesili gaýhar tasty altyn saqına qoldy bolǵan, dep habarlaıdy Kazinform agenttiginiń menshikti tilshisi.

Vallondyq Brabant aımaǵynyń prokýratýrasy tonaýshylardy tabý úshin tergeý jumystaryn bastady.

Vaterloo shaıqasy aldynda Napoleon óziniń shtab-páterin ornatqan Ferm dıý Kaııý ǵımaratyna eki ury kirip ketti. Olar terezeni syndyryp, ondaǵy buıymdardy urlaý úshin birneshe vıtrınany syndyrdy.

Imperatordyń sońǵy rezıdentsııasy Vallon Brabant provıntsııasynda ornalasqan. Ol dabyl júıesimen jáne urlyqqa qarsy ártúrli qurylǵymen qorǵalǵan. Oqıǵa kezinde dabyl iske qosylǵan, alaıda onyń paıdasy tımedi.

Urlanǵan zattardyń ishinde Napoleonǵa tıesili bes gaýhar tasy bar (18 karat) altyn saqına bolǵan. Bul saqına 1815 jyly 18 maýsymda Vaterloo shaıqasynan keıin ımperatordyń qashqan kezinde tabylǵan.

— Bul áreket bizdi qatty qynjyltady, biraq bul biregeı murany qorǵaýǵa jáne jurtshylyqpen bólisýge degen sheshimimizdi nyǵaıtady. Murajaı óz mıssııasyna adal bolyp qala beredi, — dep túsindirdi provıntsııalyq kolledjdiń prezıdenti Tangı Shtýkens.

Oqıǵa ornyna dereý kúzet kompanııasy keldi.

— Árıne, ýaqyttyń shekteýliligin eskersek, urylar qylmys ústinde ustalýy sırek. Bul deńgeıde protsedýra durys jumys istedi dep oılaımyn. Napoleonnyń sońǵy shtabynda jetkilikti senimdi júıe bolǵan. Biz ne bolǵanyn taldap, neni kúsheıtý qajet ekenin tekseretin bolamyz. Ókinishtisi kásipqoı adamdardy toqtatý qıynǵa soǵatyny anyq, — dep atap ótti Tangı Shtýkens.

Ǵımarattan altyn men kúmis teńgeler de urlanǵan.

Vallon Brabant provıntsııasynyń málimetinshe, bul zattardyń tarıhı qundylyǵy olardyń naryqtyq qunynan aıtarlyqtaı asyp túsedi jáne eýropalyq tarıhpen baılanysty biregeı mura.

Jergilikti bılik murajaıǵa erekshe sıpat berdi. Osy turǵydan alǵanda, bul urlyq úlken shyǵyn boldy.

— Kelýshilerge 1815 jylǵy oqıǵany túsindirý úshin sol tarıhtyń bóligi bolǵan buıymdar qajet. Sondyqtan mundaı jádigerlerdiń joǵalyp ketkeni óte ókinishti, — dep qosty Tangı Shtýkens. 

Murajaı qaýipsizdik maqsatynda jáne qalpyna keltirý jumystaryna baılanysty eki kúnge jabyldy. Alaıda 19 jeltoqsannan bastap qaıta ashyldy. Sondaı-aq jańa jyldyq mereke kezinde jumys isteıdi.

Aıta keteıik, buǵan deıin Parıjdegi Lývrge ury túsip, Napoleonnyń áshekeıleri qoldy bolǵan edi.