Eýropadaǵy iri taý shańǵy kýrorty aptap ystyqqa baılanysty jabyldy
ASTANA. KAZINFORM — Italııa Alpisindegi Stelvıo muzdyǵyndaǵy jazǵy taý-shańǵy maýsymy uzaqqa sozylǵan aptap ystyqqa baılanysty merziminen buryn aıaqtaldy, dep habarlaıdy BILD.
Ádette kýrort mamyrdan qarashaǵa deıin jumys isteıtin. Alaıda joǵary temperatýra men daýyldar shańǵy joldarynyń sapasyn saqtaýǵa jáne shańǵy tebýshilerdiń qaýipsizdigin qamtamasyz etýge múmkindik bermedi.
Kýrort basshylyǵy bul sheshimdi «aýyr, biraq qajetti qadam» dep sıpattady. Olar basty másele retinde túngi ýaqyttaǵy joǵary temperatýrany atap ótip, qar qabatynyń qaıta qatyp úlgermeıtinin alǵa tartty.
Aımaqta jıi bolatyn naızaǵaı men daýyldar jaǵdaıdy odan ári qıyndatqan.
Tamyz aıynyń ortasynda Italııa Alpisiniń bıik taýly aımaqtarynda erekshe joǵary temperatýra tirkelgeni habarlandy. Teńiz deńgeıinen 2000 metrden astam bıiktikte ornalasqan Fornı muzdyǵynda aýa temperatýrasy Tselsıı boıynsha 17 gradýsqa deıin kóterilse, shamamen 3000 metr bıiktiktegi Passo-Marınellı asýynda temperatýra 9 gradýsqa jetti.
Buǵan deıin Shveıtsarııanyń Tsermatt jáne Saas-Fı kýrorttary aptap ystyqqa baılanysty shańǵymen syrǵanaý jumystaryn toqtatqan bolatyn. Uqsas jaǵdaı Stelvıoda 2022 jyldyń jaz aıynda boldy. Degenmen bul demalys aımaqtary shamamen eki aıdan keıin qaıta ashyldy.
Gıdrolog Roberto Dınale qazirgi jaǵdaıda kýrorttyń jumysyn saqtaý qıyn bolatynyn aıtty.
Aıta keteıik, Rıdderdegi taý shańǵy kýrorty keńeıtiletin boldy.
