Eýropadaǵy órtter Kıpr aýmaǵyndaı jerdi joıdy

ASTANA. KAZINFORM — Eýropalyq Odaq elderinde orman órtteriniń aýdany 2006 jyldan beri esepke alynǵan kezeń ishinde alǵash ret 1 mıllıon gektardan asty, dep habarlaıdy Kazinform agenttiginiń menshikti tilshisi Politico basylymyna silteme jasap.

Aǵymdaǵy jyldyń qańtar aıynan bastap orman órtteri 1 016 000 gektar ormandy joıǵan. Bul — Kıpr aralynyń aýmaǵynan artyq nemese Belgııa aýmaǵynyń úshten bir bóligine teń.

Buǵan deıingi antırekord 2017 jyly tirkelgen bolatyn, ol kezde Eýropada shamamen 988 myń gektar orman órtengen.

Eýropalyq Odaqtyń Orman órtteri jónindegi aqparattyq júıesiniń (EFFIS) derekterine sáıkes, jalpy shyǵynnyń úshten ekisi 5 tamyzdan keıingi kezeńge tıesili, bul kezde 380 myń gektardan astam aýmaq janyp ketken.

Eń kóp órt Pıreneı túbeginde tirkelgen.

Osyǵan deıin Ispanııadaǵy orman órti aýyl sharýashylyǵyna 600 mln eýro shyǵyn keltirgenin jazdyq.