Eýropadaǵy orman órti: Frantsııa dabyl qaqty, Ispanııa tótenshe jaǵdaı jarııalady
ASTANA. KAZINFORM — Frantsııa prezıdenti Emmanıýel Makron eldiń ońtústik-batysyndaǵy Bordo qalasyna orman órti jaqyndaýyna baılanysty 27 shildede úkimettiń shuǵyl otyrysyn ótkizedi, dep habarlaıdy VVS.
Bordo mańyndaǵy aýdandardan ondaǵan myń turǵyn evakýatsııalandy. Frantsııanyń ishki ister mınıstri Loran Nýnes órttiń baqylaýdan shyǵyp, qalaǵa qaraı taralyp jatqanyn málimdep, ahýaldy «óte kúrdeli» dep baǵalady.
Orman órtteri Frantsııaǵa aıtarlyqtaı áser etti. Eldiń ońtústik-batysynda shamamen 42 myń gektar orman órtendi, bul — Ekinshi dúnıejúzilik soǵystan beri eń iri orman órtteriniń biri. Jyl basynan beri shamamen 98 myń gektar órtenip ketti.
Aýa raıy boljamyna qaraǵanda, seısenbiden bastap eldiń keı bóliginde aýa temperatýrasy 40 gradýs ystyqqa deıin kóterilýi múmkin.
Buryn-sońdy bolmaǵan aptap ystyq pen uzaqqa sozylǵan qurǵaqshylyq Eýropada orman órtteriniń jıileýine ári jalynnyń tez taralýyna sebep bolyp otyr.
Sońǵy aptada orman órtteri eýropalyq birneshe eldi sharpydy, eń aýyr jaǵdaı Frantsııa men Ispanııada baıqalǵan. Qaýipti aımaqtardan barlyǵy 300 myńnan astam adam evakýatsııalandy.
Ispanııada órt shamamen 77 myń gektar jerdi sharpydy.
Úkimet orman órtterinen zardap shekken ortalyq provıntsııalar úshin azamattyq qorǵanys salasynda tótenshe jaǵdaı jarııalaýdy kózdep otyr, bul qalpyna keltirý úshin qosymsha qarajat bólýge múmkindik beredi.
Ispanııa premer-mınıstriniń aıtýynsha, qańtar aıynan beri elde 150 myń gektardan astam jer órtenip ketken, bul ótken jyldyń sáıkes kezeńimen salystyrǵanda alty ese kóp.
Osyǵan deıin Býrabaı ulttyq parkinde orman órtin sóndirýge tikushaq tartylǵanyn jazdyq.
