Eýropadaǵy qalyń qar: 6 adam qaza tapty, júzdegen áýe reısi toqtatyldy
ASTANA. KAZINFORM — Eýropa boıynsha toqtaýsyz qalyń qar jaýyp, onyń sońy kóktaıǵaqqa ulasyp, kólikterdiń keptelisi de qıyndyq týǵyzdy. Resmı málimetke súıensek, qolaısyz aýa raıyna baılanysty bolǵan oqıǵalar saldarynan qurlyqta alty adam qaza tapqan. Bul týraly VVS jazdy.
Eýropanyń túkpir-túkpirinde júzdegen áýe reısi toqtatylyp, Parıj ben Amsterdam áýejaılarynda myńdaǵan jolaýshy keptelip qaldy.
Frantsııanyń ońtústik-batysyndaǵy Land departamentinde kóktaıǵaq saldarynan bolǵan eki jol-kólik oqıǵasynda úsh adam qaza tapty, dep habarlady bılik ókilderi.
Taǵy eki adam Parıj aımaǵynda bolǵan jeke jol-kólik oqıǵalarynda kóz jumdy. Olardyń biri Parıjdiń shyǵysynda jeńil avtokóliktiń júk kóligimen soqtyǵysýy saldarynan bolǵanyn polıtsııa habarlady.
Taǵy bir jaǵdaıda qardyń saldarynan taksı kóligi jol jıegine soǵylyp, Marna ózenine qulaǵan, dep habarlady buqaralyq aqparat quraldary.
Balqan elderinde de qar jaýyp, nóser jańbyr baıqaldy. Dúısenbi kúni Bosnııa astanasy Saraevoda áıel adam ústine dymqyl qardyń salmaǵynan aǵash qulap, qaza tapty, dep málimdedi polıtsııa.
Frantsııanyń kólik mınıstri Fılıpp Tabaro seısenbi túni men sársenbi kúni elde qardyń jaýýy odan ári kúsheıetinin aıtty. Ol turǵyndardy múmkindiginshe saparǵa shyqpaýǵa jáne qashyqtan jumys isteýge shaqyrdy.
Frantsııanyń ulttyq meteorologııalyq qyzmeti sársenbi kúni 38 departament qar men kóktaıǵaqqa baılanysty aýa raıynyń qaýiptiliginiń «qyzǵylt sary» deńgeıine kóshiriletinin habarlady. Birqatar óńirde kóptegen temirjol reısteri toqtatyldy.
Parıj bıligi sársenbi kúni tańerteń birneshe saǵat boıy Rýassı — Sharl-de-Goll áýejaıynda reısterdiń 40 paıyzy toqtatylatynyn málimdedi. Bul áýejaı qyzmetkerlerine ushý-qoný jolaqtaryn qardan tazalaýǵa múmkindik berý úshin jasalmaq. Al Orlı áýejaıy osy ýaqyt aralyǵynda reısteriniń tórtten birin toqtatýdy josparlaǵan.
Amsterdamdaǵy Shıphol áýejaıynda sársenbi kúni 400-den astam reıs toqtatyldy.
Júzdegen jolaýshy áýejaılarda qalyp qoıdy, kópshiligi qosylatyn reısterine úlgere almady. Áýe kompanııalarynyń tirkeý oryndarynyń aldynda uzyn-sonar kezek paıda bolyp, adamdar reısterdiń qaıta qashan bastalatyny týraly aqparat kútip otyr.
Eske sala ketsek, Frantsııada elektr energııasyn tutyný rekordtyq deńgeıge jetti. Oǵan negizinen eldegi tómengi aýa temparatýrasy sebep bolyp otyr.
