Eýropadaǵy eń iri teńiz portynda jarylys boldy: qaza tapqan adam bar
ASTANA. KAZINFORM – Nıderlandtaǵy Rotterdam portynda jarylys bolyp, keminde bir adam qaza tapty, taǵy birneshe adam jaraqat aldy, dep habarlaıdy Euronews.
Qala polıtsııasynyń málimetinshe, oqıǵa beısenbi kúni túske taman munaı óńdeý zaýyty men Gunvor Energy kompanııasynyń otyn termınaly ornalasqan ónerkásiptik aımaqta bolǵan. Tótenshe jaǵdaıdyń mán-jaıy men sebebin anyqtaý úshin aýmaq qorshaýǵa alyndy.
Nıderlandtyń NOS teleradıokompanııasynyń habarlaýynsha, oqıǵa kezinde bul aýmaqta qubyr jóndeý jumystary júrgizilip, tehnıkalyq qyzmet kórsetý brıgadasy jumys istegen.
Rotterdamnyń tótenshe jaǵdaılar qyzmeti portta elektr qýaty óshkenin habarlady. Sondaı-aq ázirge belgisiz sebeppen transformator órtengen.
Oqıǵadan keıin jergilikti birqatar kásiporyn jumysyn toqtatyp, qyzmetkerlerin evakýatsııalady. Birneshe saǵattan keıin porttyń ónerkásiptik aımaǵyna elektr energııasyn berý birtindep qalpyna keltirile bastady.
Polıtsııa ázirge dıversııa belgileri anyqtalmaǵanyn, degenmen oqıǵanyń barlyq yqtımal nusqasy qarastyrylyp jatqanyn málimdedi.
Bul aýdanda birqatar munaı-gaz kompanııasynyń keńseleri ornalasqan. Órt sóndirý bólimderi daıyndyq rejıminde qaldy.
Ázirge porttaǵy elektr qýatynyń óshýi men jarylystyń bir-birimen baılanysty ekeni anyqtalǵan joq.
Aıta keteıik, buǵan deıin Italııadaǵy oq-dári zaýytynda jarylys bolyp, adamdar evakýatsııalanǵanyn jazdyq.
