Eýropadaǵy eń baı adamnyń salyq tóleýge nıeti joq
ASTANA. KAZINFORM — Frantsııanyń ákimshilik soty LVMH sán-saltanat taýarlary tobynyń bas dırektory ári Eýropadaǵy eń baı adam sanalatyn Bernar Arnony Frantsııaǵa qosymsha 22,5 mln eýro kóleminde salyq tóleýge mindettedi.
L’Informé basylymynyń málimetinshe, is LVMH kompanııasynyń aktsıonerlik qurylymyna qatysty. Arno áýleti kompanııa aktsııalaryna tikeleı emes, birneshe holdıng arqyly ıelik etedi. Holdıngterdiń eń joǵarǵy satysynda Belgııada tirkelgen Pilinvest kompanııasy ornalasqan. Bul qurylym Frantsııadaǵy salyq júktemesin azaıtýǵa múmkindik bergen.
Qosymsha eseptelgen salyq 2010–2015 jyldar aralyǵyn qamtıdy. Onyń ishinde:
-
2010 jyl úshin tabys salyǵy men áleýmettik aýdarymdar – 12,96 mln eýro;
-
2012–2015 jyldardaǵy múlik salyǵy – 9,5 mln eýro.
2020 jyldyń sońynda Parıjdiń ákimshilik soty Arno jubaılarynyń qosymsha tabys salyǵynan bosatý jáne múlik salyǵyn qaıtarý týraly ótinishin qanaǵattandyrǵan bolatyn. Alaıda Frantsııa memleketi bul sheshimge shaǵym túsirdi. Arno otbasynyń ókili olardyń endi Frantsııanyń Memlekettik keńesine apellıatsııalyq shaǵym beretinin málimdedi.
Bloomberg agenttiginiń mıllıarderler ındeksine sáıkes, Bernar Arnonyń baılyǵy 165 mlrd dollar kóleminde baǵalanady. Bul ony Eýropadaǵy eń dáýletti adam etedi.
LVMH quramyna álemge tanymal Louis Vuitton, Christian Dior, Moët & Chandon jáne Sephora sııaqty lıýks brendter kiredi.
