Eýropadaǵy aptap ystyqtan 12 myńnan astam adam kóz jumdy
ASTANA. KAZINFORM – Maýsym aıynyń sońynda Batys Eýropany sharpyǵan aptap ystyq saldarynan 12 myńnan astam adam qaıtys boldy, dep habarlaıdy DW.
AFP agenttigi Belgııa, Germanııa, Ispanııa, Lıýksembýrg, Nıderland, Frantsııa jáne Shveıtsarııanyń derekterin taldaý nátıjesinde osyndaı qorytyndyǵa kelgen.
Esepke sáıkes, 22–28 maýsym aralyǵynda, aptap ystyq shegine jetken kezeńde, atalǵan jeti elde qaıtys bolǵandar sany ótken jyldardyń osy kezeńindegi ortasha kórsetkishten shamamen 10 myń adamǵa kóp bolǵan. Buǵan qosa, Ulybrıtanııanyń Meteorologııa qyzmetiniń málimetinshe, 18–28 maýsym aralyǵynda Anglııa men Ýelste taǵy 2,2 myńǵa jýyq artyq ólim tirkelgen. Zertteýge Shyǵys Eýropa elderi engizilmegen.
Aptap ystyq nelikten adam ómirine asa qaýipti?
Dúnıejúzilik densaýlyq saqtaý uıymynyń (DDU) Eýropalyq óńirlik bıýrosynyń dırektory Hans Klıýgeniń aıtýynsha, mundaı ólim-jitimniń basym bóliginiń aldyn alýǵa bolatyn edi.
– Kóptegen úkimetter aptap ystyqty densaýlyq saqtaý salasyndaǵy tótenshe jaǵdaı emes, jaı ǵana aýa raıy qubylysy retinde qarastyrýdy jalǵastyryp keledi. Bul jaz onyń saldary qandaı bolatynyn aıqyn kórsetti, – dedi ol.
Germanııada 22–28 maýsym aralyǵynda keı óńirlerde aýa temperatýrasy +41 °C-tan asyp, osy kezeńde shamamen 23,9 myń adam qaıtys boldy. Bul eki apta burynǵy kórsetkishten 7,1 myńǵa kóp.
Eń joǵary qaýip tobyna kimder kirdi?
Zertteýlerge sáıkes, aptap ystyqtan kóz jumǵandardyń basym bóligi – 65 jastan asqan adamdar. Joǵary temperatýra jylý soqqysyna, sondaı-aq júrek-qan tamyrlary jáne tynys alý júıesi aýrýlarynyń asqynýyna ákelýi múmkin.
Mamandar klımattyń ózgerýine baılanysty ekstremaldy ystyq kezeńderi jıilep, uzara túsetinin aıtyp, densaýlyq saqtaý júıesin daıyndaý men halyqty der kezinde eskertý adam shyǵynyn azaıtýdyń negizgi tetikteri ekenin atap ótti.
Aıta keteıik, Nıderlandyda aptap ystyqtan ólim-jitim jıiledi.
Al Qytaıdyń aptap ystyqpen «jasandy jańbyr» arqyly kúresip jatqanyn habarladyq.
