Eýropadaǵy 18 myńnan astam qonaqúı Booking platformasyn sotqa berdi
ASTANA. KAZINFORM — Eýropadaǵy 18 myńnan astam qonaqúı Booking brondaý platformasyna qarsy ujymdyq talap-aryzǵa qosyldy. Qonaqúı ıeleri básekeni shektegeni úshin birneshe mıllıard eýro kóleminde ótemaqy talap etip otyr, dep habarlaıdy Kazinform agenttigi BILD basylymyna silteme jasap.
Amsterdam qalalyq sotyna Booking onlaın brondaý platformasyna qarsy ujymdyq talap-aryzdyń sońǵy bóligi tapsyryldy. Sot isine barlyǵy 18 135 eýropalyq qonaqúı qosylyp, birneshe mıllıard eýro kóleminde ótemaqy talap etip otyr.
Sot daýyna qonaqúılerdiń óz saıttarynda Booking platformasyndaǵydan tómen baǵa belgileýine tyıym salǵan sharttar sebep bolǵan. Mundaı shekteýler birneshe ondaǵan jyl boıy qoldanylǵan.
2024 jyly Eýropalyq odaq soty mundaı talaptardyń EO-nyń básekelestik týraly zańnamasyna qaıshy keletinin moıyndady. Qonaqúı ıeleriniń aıtýynsha, osy shekteýler saldarynan olar aıtarlyqtaı qarjylyq shyǵynǵa ushyraǵan.
Alaıda sot protsesi ázirshe platformanyń klıentterine áser etpeıdi.
Advokat Nıkol Mýtshkeniń BILD basylymyna túsindirýinshe, Booking qonaqúı men klıent arasyndaǵy deldal ǵana, al kelisimshart tikeleı eki taraptyń arasynda jasalady.
Zańgerdiń aıtýynsha, qonaqúı Booking-pen seriktestigin toqtatqan kúnniń ózinde buryn rastalǵan brondardy oryndaýǵa mindetti.
Eske salaıyq, 2025 jylǵy tamyzda Eýropanyń 10 myńnan astam qonaqúıi de Booking.com platformasyna qarsy ujymdyq talap-aryzǵa birigip, ózderine qarjylaı shyǵyn kelgenin málimdegen edi.
Talap-aryzǵa 2024 jyly Eýropalyq odaq sotynyń Booking.com platformasyndaǵy «eń tómen baǵa» týraly sharttar monopolııaǵa qarsy zańnamany buzady degen sheshimi negiz bolǵan. Qazir tyıym salynǵan bul talaptar qonaqúılerdiń baǵa belgileý erkindigin shektep, básekelestikti álsiretken. Sonyń saldarynan qonaqúıler óz saıttarynda nemese basqa brondaý platformalarynda tómen baǵa usyna almaǵan.
Talap-aryzda 2004-2024 jyldar aralyǵynda qonaqúıler osy shekteýlerden aıtarlyqtaı qarjylaı shyǵynǵa batqany kórsetilgen.