Eýropada jyl saıyn sút bezi qaterli isiginiń 350 myń jańa oqıǵasy tirkelip, 130 myń áıel osy aýrýdan qaıtys bolady
BRıÝSSELЬ. Tamyzdyń 11-i. QazAqparat /Dımash Syzdyqov/ - Eýroodaq elderinde jyl saıyn sút bezi qaterli isiginiń 350 myń jańa oqıǵasy tirkelip, 130 myńdaı áıel osy aýrýdan qaıtys bolady. Sút beziniń qaterli isigin anyqtaıtyn tıimdi tehnologııanyń joqtyǵy, keıbir oqıǵalardyń baıqaýsyz qalýyna nemese dıagnozdyń durys qoıylmaýyna ákep tireıdi, dep habarlady Eýrokomıssııanyń baspasóz qyzmetinen.
Qaterli isik dıagnostıkasynyń jańa ádisterin jasaý jáne synaqtan ótkizý maqsatynda Eýroodaq «HAMAM» dep atalatyn jańa jobaǵa (aǵylshynsha ataýy «HAMAM») 3,1 mıllıon eýro ınvestıtsııalap otyr. Jańa joba mammografııa, magnıttik-rezonansty tomografııa jáne basqa da tehnologııalardyń qorytyndylary negizinde mýltımodaldyq sýretterdi yqpaldastyra otyryp jáne patsıent týraly málimetterdi jınastyra otyryp, sút beziniń qaterli isigin dıagnostııalaýǵa kómektesetin jańa jumys stansasynyń prototıpin jasaýǵa negizdeledi. Dárigerler patsıenttiń aýrýynyń tarıhy men medıtsınalyq analızderin qaraý kezinde mýltımodaldyq sýretterdi salystyra alady. Jumys stansasy Germanııa, Ulybrıtanııa jáne Nıderlandy elderiniń keıbir aýrýhanalarynda synaqtan ótkiziledi.
Eýrokomıssııanyń vıtse-prezıdenti Nelı Krýs hanymnyń atap kórsetýinshe «sút beziniń qaterli isigi dúnıejúzi boıynsha mıllıondaǵan adamnyń ómirine qaýip tóndirip otyr. «HAMAM» jobasy sátti júzege asqan jaǵdaıda, ol qaterli isikti erterek anyqtaýǵa, myńdaǵan adamnyń ómirin saqtaýǵa múmkindik beredi».
