Eýropada jańa shekteýler men erejeler kúshine endi

NUR-SULTAN. QazAqparat – Belgııada el halqynyń 76%-y vaktsınalanǵanyna qaramastan, sońǵy aptada koronavırýs juqtyrýshylar sany kúrt ósti, dep habarlaıdy QazAqparat Euronews agenttigine silteme jasap.

Osyǵan baılanysty elde shekteý sharalary kúsheıtiledi. Endi qoǵamdyq oryndarda tipti on jastan asqan balalar da maska taǵýy qajet, keminde 12 jeltoqsanǵa deıin múmkindigi bar adamdar bes kúnniń tórt kúninde úıden jumys isteýi kerek.

Shvetsııada bılik alǵash ret kovıd pasporty engiziletinin jarııalady, ony 1 jeltoqsannan bastap 100-den astam adam qatysatyn jáne jabyq jerde ótetin sharalarǵa qatysý úshin usyný qajet bolady.

«Eýropada taǵy da aýrýdyń taralýy baıqalyp, kóptegen elder jańa shekteýler engizýge májbúr boldy. Shvetsııada mundaı ósim áli baıqalmaıdy, biraq biz syrtqy álemnen oqshaýlanbaımyz jáne bul bizge de áser etetinine daıyn bolýymyz kerek», – dedi Shvetsııanyń densaýlyq saqtaý mınıstri Lena Hallengren.

Aýrýlar sanynyń edáýir ósýi sońǵy kúnderi Chehııada da baıqaldy.

Seısenbide munda 22,5 myńǵa jýyq jańa jaǵdaı anyqtaldy, bul – pandemııa bastalǵannan bergi eń joǵary kórsetkish.

Osyǵan baılanysty elde vaktsınalanbaǵan jáne kovıdpen aýyryp şyqpaǵan adamdar úshin jańa shekteýler engizilýde.

Bılik buǵan deıin qabyldanǵan sharalar ınfektsııanyń taralýyn boldyrmaý úshin jetkiliksiz boldy dep otyr.