Eýropada jańa Samsung retinde satylǵan mıllıonǵa jýyq jalǵan smartfon anyqtaldy
ASTANA. KAZINFORM — 2017 jyldan beri Eýropada jańa Samsung smartfondary retinde mıllıonǵa jýyq jalǵan qurylǵy satylýy múmkin. Olardy Dýbaı men Gonkongtaǵy sheberhanalarda qurastyryp, Amazon jáne basqa da ınternet-platformalar arqyly satqan, dep habarlaıdy BILD.
Tergeý nusqasyna sáıkes, boljamdy qylmystyq jeli smartfondardy Amazon jáne ózge de ınternet-platformalar arqyly ótkizgen. Aýqymdy operatsııa bastalǵanǵa deıin jeti kúdikti ustalǵan.
Tergeýshilerdiń boljamynsha, jalǵan qurylǵylar buryn qoldanylǵan bólshekterden qurastyrylǵan. Quramdas bólshekter Azııa men arab elderinen satyp alynyp, keıin tazalanyp, qaıta paıdalanylǵan.
Smartfondardy Dýbaı men Gonkongtaǵy sheberhanalar qurastyrǵan. Daıyn qurylǵylar jańa túpnusqa smartfondardan ajyratý qıyn bolatyndaı etip qaptalǵan.
Boljamdy shemanyń negizgi ortalyqtarynyń biri Germanııanyń Krefeld qalasyndaǵy qoıma bolǵan. Quqyq qorǵaý organdary sol jerden jańa qurylǵy retinde satýǵa daıyndalǵan myńdaǵan smartfon tapqan.
2017 jyldan beri bul jeli jalǵan telefondardy satýdan keminde 300 mln eýro tabys tapqan bolýy múmkin. Tergeý málimetinshe, tek Germanııanyń ózinde shemaǵa qatysýshylar keminde 24 mln eýro kóleminde salyq tóleýden jaltarǵan bolýy yqtımal.
Tergeý derekterine sáıkes, bul úshin jalǵan kompanııalar jelisi men shekaraaralyq oıdan shyǵarylǵan jetkizilimder paıdalanylǵan.
Buǵan deıin telefondy alaıaqtardan qorǵaý úshin ishindegi 10 baptaýdy teksergen durys ekeni týraly jazǵan bolatynbyz.
