Eýropada ýltrakúlgin sáýleniń ındeksi jyl saıyn 1–2%-ǵa ósip keledi
ASTANA. KAZINFORM — Germanııanyń Radıatsııadan qorǵaý jónindegi federaldyq vedomstvosy (BfS) 2013–2022 jyldar aralyǵynda Eýropada ýltrakúlgin ındeksiniń ósýine qatysty zertteý nátıjelerin jarııalady. Bul týraly DW jazdy.
Osy kezeńde ýltrakúlgin ındeksi orta eseppen 10–20%-ǵa, ıaǵnı jyl saıyn shamamen 1,2%-ǵa ósken. Ýltrakúlgin sáýlelený deńgeıi ásirese Germanııa, Nıderland, Ulybrıtanııa jáne Slovakııada aıtarlyqtaı artqan.
Vedomstvonyń DW-ge habarlaýynsha, Shyǵys Eýropada da ýltrakúlgin ındeksi ósip keledi, biraq qarqyny tómenirek. Batys Eýropadaǵy sııaqty, bul qubylys bulttylyq deńgeıiniń tómendeýimen baılanysty bolýy yqtımal.
Al Baltyq elderinde jáne odan ári shyǵysqa qaraı ýltrakúlgin ındeksiniń ósýi aıtarlyqtaı baıqalmaıdy. Sebebi bul óńirlerde bultty kúnder áli de kóp.
Máskeýde ýltrakúlgin ındeksi jylyna shamamen 0,8%-ǵa artyp otyr. Nemis ǵalymdary muny «statıstıkalyq turǵydan mańyzdy ósim» dep baǵalaıdy. Alaıda bul ózgeristiń naqty bulttylyqtyń azaıýyna nemese basqa faktorlarǵa baılanysty ekenin ázirge anyqtaý múmkin emes.
BfS mamandary kún sáýlesiniń astynda uzaq ýaqyt tikeleı turmaýǵa jáne kúnnen qorǵaný úshin kóleńkede kóbirek bolýǵa shaqyrdy. Bul kúnge kúıip qalýdyń aldyn alýǵa kómektesedi.
Aıta keteıik, 12 tamyzda birneshe eldiń turǵyndary sırek kezdesetin qubylysty, Kúnniń tolyq tutylýyn kórdi. Aı Kúndi tolyǵymen jaýyp, kúndiz aspandy birneshe mınýtqa ymyrtqa batyrady. Bul astronomııalyq oqıǵa jyldyń negizgi aspan qubylystarynyń biri bolady jáne Perseıd meteorlyq aǵynynyń shyńymen sáıkes keledi.
