Eýropada týý kórsetkishi tarıhı eń tómengi deńgeıge tústi
ASTANA. KAZINFORM — 2024 jyly Eýropa Odaǵynda jalpy týý kórsetkishi ár áıelge 1,34 tiri týǵan baladan týra keldi, bul 2001 jyldan bergi eń tómengi deńgeı, dep habarlaıdy Kazinform Eurostat deregine silteme jasap.
EO statıstıkalyq qyzmetiniń habarlaýynsha, 2024 jyly Odaqta 3,55 mıllıon bala dúnıege keldi, bul 2023 jylǵy 3,67 mıllıon baladan 3,3%-ǵa az. Al týý kórsetkishi 2023 jyly 1,38 bolatyn.
EO elderi arasynda eń joǵary kórsetkish Bolgarııada tirkeldi. Balqan elinde týý kórsetkishi ár áıelge shaqqanda 1,72 baladan týra keldi. Keıingi oryndarda Frantsııa (1,61) jáne Slovenııa (1,52) keledi. Eń tómengi kórsetkishter Maltada (1,01), Ispanııada (1,10) jáne Lıtvada (1,11) tirkeldi. EO-nyń eshbir elinde týý kórsetkishi demografııalyq turaqtylyq deńgeıine jetken joq, ádette halyq sany turaqty saqtalýy úshin bir áıelge shaqqandaǵy týý kórsetkishi shamamen 2,1 baladan kem bolmaýy kerek.
Sońǵy 20 jylda EO-daǵy týý kórsetkishi 1,34 pen 1,57 aralyǵynda bolyp, turaqtylyq deńgeıinen udaıy az bolyp keldi.
Eýrostat óńirlik derekterdi de jarııalady. Ispanııanyń 16 óńirinde, Polshanyń 7 óńirinde, Italııanyń 5, Grekııanyń 3, Germanııa men Lıtvanyń 2 óńirinde bir áıelge bir baladan tómen kórsetkishter tirkeldi. Ásirese, Ispanııanyń soltústik-batysynda, Ispanııa araldarynda jáne Sardınııada tómen kórsetkishter tirkeldi.
Sonymen qatar, Bolgarııa men Frantsııanyń 14 óńirinde bul kórsetkish 1,75 nemese odan joǵary boldy. Germanııanyń, Slovenııanyń, Majarstannyń, Nıderlandtardyń jáne Rýmynııanyń keıbir aımaqtarynda da týý kórsetkishi salystyrmaly túrde joǵary.
EO-da áıelderdiń tuńǵysh balasyn bosaný ortasha jasy 2024 jyly 29,9 jas boldy (Bolgarııada 26,9 jas, Italııada 31,9 jas). Odaqta týǵan balalardyń shamamen tórtten biriniń anasy Odaq aýmaǵynan tysta dúnıege kelgen.
EO, Frantsııa, Polsha jáne Rýmynııa boıynsha 2024 jylǵy derekter aldyn ala nemese boljamdy málimetter ekenin aıta ketken jón.
Eske salaıyq, Ońtústik Koreıada týý kórsetkishi 26 aıdan beri turaqty ósip keledi.
