Eýropada týrıster eń uzaq aıaldaıtyn el anyqtaldy
ASTANA. KAZINFORM — Italııa Frantsııa men Ispanııany basyp ozyp, týrıster sany boıynsha alǵa shyqty. Sondaı-aq el týrısterdiń ortasha aıaldaý uzaqtyǵy jóninen Eýropada birinshi orynǵa ıe boldy. Muny Italııa premer-mınıstri Djordja Melonı málimdedi. Bul týraly Agenzia Nova basylymy jazdy.
Italııa úkimetiniń basshysy bul týraly Rımdegi Rıpetta saraıynda ótken «Italııa baýyrlary» partııasynyń týrızm departamenti uıymdastyrǵan tórtinshi baǵdarlamalyq konferentsııaǵa qatysýshylarǵa joldaǵan beıneúndeýinde aıtty.
Melonıdiń sózinshe, týrızm — el ekonomıkasy úshin strategııalyq mańyzy bar sala ǵana emes, ulttyq bolmystyń ajyramas bóligi.
— Týrızm — ekonomıkamyzdyń strategııalyq salasynan áldeqaıda aýqymdy uǵym. Ol — bizdiń bolmysymyzdyń bir bóligi. Óıtkeni týrızm álemge Italııany tanystyrady, ómir saltymyzdy kórsetedi jáne biz eń úzdik jasaı alatyn dúnıelerdi dáripteıdi, — dedi premer-mınıstr.
Ol sheteldik saıahatshylar Italııany tek demalý úshin emes, erekshe áser alý maqsatynda da tańdaıtynyn atap ótti.
— Italııany tańdaǵandar munda jaı ǵana demalystan áldeqaıda kóp nárse alýǵa bolatynyn biledi. Olar bul elde erekshe áserge bólenetinin túsinedi. Memlekettik ınstıtýttardyń mindeti — osy salada eńbek etip júrgen adamdarǵa týrısterdiń áserin odan ári umytylmastaı etýge kómektesý, — dedi Melonı.
Onyń aıtýynsha, keıingi jyldary úkimet ınvestıtsııalardy qoldap, týrıstik qyzmetterdiń sapasyn arttyrýǵa basymdyq bergen. Sondaı-aq saladaǵy zańsyz árekettermen kúresip, eldiń barlyq óńirinde jyl boıy týrızmdi damytýǵa kúsh salǵan.
Melonı Italııaǵa baratyn saıahatshylar sany jóninen Frantsııa men Ispanııadan ozyp ketkenin málimdedi.
— Bul — biz maqtan tutatyn tarıhı jetistik. Sonymen qatar týrısterdiń elde ortasha aıaldaý uzaqtyǵy boıynsha Eýropada birinshi oryndamyz. Demek, týrıstik júıemiz sheteldik qonaqtardy kóbirek tartyp qana qoımaı, olardyń elde uzaq ýaqyt bolýyna da jaǵdaı jasaıdy, — dedi úkimet basshysy.
Premer-mınıstrdiń sózinshe, týrısterdiń elde uzaq bolýy olardyń shyǵynyn kóbeıtip, jańa jumys oryndarynyń ashylýyna jáne týrızmnen túsetin ekonomıkalyq paıdanyń ósýine yqpal etedi.
— Týrıst elde neǵurlym uzaq bolsa, soǵurlym kóp aqsha jumsaıdy. Bul jańa jumys oryndaryn ashyp, tabys ákeledi jáne barshaǵa paıdasyn tıgizedi, — dep túıindedi Melonı.
Eske salaıyq, BBC Travel nusqasy boıynsha Almaty 2027 jyly saıahattaýǵa arnalǵan álemniń úzdik 20 baǵytynyń qataryna endi. Ol bul tizimge kirgen Ortalyq Azııadaǵy jalǵyz qala boldy.