Eýropada turǵyn úı baǵasy qymbattady: qaı elderde ósim joǵary

Turǵyn úı baǵasy Bolgarııada 15,5%-ǵa, Lıtvada 14,3%-ǵa, Slovakııada 13,6%-ǵa, Horvatııada 12,7%-ǵa qymbattady. Ispanııa men Rýmynııada ósim 12,1%-dy, Latvııada 11,4%-dy, Majarstanda 10,2%-dy qurady.

Taǵy úsh elde baǵa ósimi 10%-ǵa jýyqtady. Danııada turǵyn úı 9,4%-ǵa, Slovenııada 9,1%-ǵa, Chehııada 8,6%-ǵa qymbattady.

Eýropalyq odaqtyń iri ekonomıkalary arasynda turǵyn úı baǵasy eń kóp Ispanııada ósti – 12,1%. Italııada ósim 4%-dy qurasa, Germanııada nebári 0,6% boldy.

Al Fınlıandııa, Lıýksembýrg jáne Frantsııa Eýropalyq odaqta turǵyn úı baǵasy bir jylda tómendegen jalǵyz elder boldy. Bul elderde baǵa tıisinshe 2,7%-ǵa, 2,2%-ǵa jáne 0,8%-ǵa arzandady.

Eurostat málimetinshe, Eýropalyq odaqta turǵyn úı baǵasynyń ortasha ósimi ınflıatsııa deńgeıinen joǵary boldy. 2026 jyldyń ekinshi toqsanynda ınflıatsııa 3,2%-dy qurady. Naqty mánde jyljymaıtyn múlik baǵasy 1,5%-ǵa ósti.

Global Property Guide jyljymaıtyn múlik naryǵynyń sarapshysy Mıkk Kalmet elder arasyndaǵy aıyrmashylyqty turǵyn úı tapshylyǵymen, halyq tabysynyń ózgerýimen, ıpotekalyq nesıe berý sharttarymen jáne demografııalyq faktorlarmen baılanystyrady. Onyń aıtýynsha, suranys usynystan edáýir asyp túsetin elderde baǵa ósimi aıqyn baıqalady.

Atap aıtqanda, Portýgalııada jańa turǵyn úı qurylysy kóleminiń shekteýliligi, sheteldik ınvestıtsııalar jáne Lıssabon, Portý qalalary men tanymal jaǵalaý aýdandaryndaǵy joǵary suranys baǵaǵa qosymsha qysym túsirip otyr.

Bolgarııada baǵanyń ósýine halyq tabysynyń artýy, jalaqynyń kóterilýi, ıpotekalyq nesıeniń salystyrmaly túrde qoljetimdi bolýy jáne jyljymaıtyn múliktiń ınvestıtsııalyq aktıv retindegi suranysy yqpal etedi.

Sonymen birge Eýropa jyljymaıtyn múlik naryǵyndaǵy baǵanyń aldaǵy ózgerisi ázirge belgisiz. Sarapshylar ıpotekalyq nesıeleý quny men halyqtyń satyp alý qabiletindegi ózgerister aldaǵy kezeńde suranysqa áser etýi múmkin ekenin atap ótti.

Eske sala keteıik, Ispanııada halyq bılikten qoljetimdi baspana talap etip, kóshege shyqty.