Eýropada tapsyryspen jasalatyn qylmystarǵa qarsy operatsııada 280 adam ustaldy
ASTANA. KAZINFORM – Eýropol Eýropada «tapsyryspen jasalatyn zorlyq-zombylyqqa» qarsy aýqymdy operatsııa barysynda 280 adamdy ustaǵanyn málimdedi, dep habarlaıdy Euronews.
Vedomstvo dereginshe, qylmystyq toptar áleýmettik jeliler men messendjerlerdi paıdalanyp, tapsyryspen shabýyl jasaý men kisi óltirýdi oryndaýshylardy belsendi túrde tartyp jatyr.
2025 jyldyń sáýirinde qurylǵan Eýropoldyń halyqaralyq jedel toby «qyzmet retindegi zorlyq-zombylyqpen» kúresý aıasynda bir jyl ishinde 280 adamdy tutqyndap, tapsyryspen jasalatyn qylmystarǵa qatysy bar 1400-den astam adamdy anyqtaǵan.
«Grımm» kodtyq ataýymen júzege asyrylyp jatqan joba Eýropanyń 11 eliniń polıtsııasyn biriktiredi. Ol qylmystyń jańa modeline qarsy baǵyttalǵan. Bul modelde shabýyldar men kisi óltirýlerdi júzege asyratyn adamdar tsıfrlyq platformalar arqyly jaldanady.
Eýropol málimetinshe, qylmyskerler oryndaýshylardy, onyń ishinde jasóspirimder men jastardy ınternet arqyly izdeýdi jıiletken. Qylmystyq áreketter áleýmettik jeliler men messendjerler arqyly úılestirilip, ulttyq shekaradan tys uıymdastyrylady.
Vedomstvo «zorlyq-zombylyqtyń» tsıfrlyq ortada qoljetimdi «qyzmetke» aınalyp bara jatqanyn, tipti gıg-ekonomıka modeline uqsap ketkenin atap ótti.
Tergelip jatqan isterdiń qatarynda Germanııadaǵy jarylystar, Nıderlandtaǵy atystar jáne transshekaralyq jelilermen baılanysty basqa da aýyr qylmystar bar.
Eýropol sondaı-aq ınternettegi adamdardy tartýdy shekteý úshin Google, Meta, TikTok jáne Snapchat sııaqty iri tehnologııalyq kompanııalarmen yntymaqtastyq ornatqanyn habarlady. Alaıda keıbir platformalar bul bastamaǵa áli qosylmaǵan.
Bul másele ásirese Shvetsııa úshin ózekti. Onda qylmystyq toptar 15 jasqa tolmaǵan balalardy jıi tartady. El zańnamasyna sáıkes, mundaı balalar qylmystyq jaýapkershilikke tartylmaıdy jáne áleýmettik qyzmetterdiń qamqorlyǵynda bolady. Bul olardy qylmystyq jaýapkershilikke tartýdy qıyndata túsedi.
Bólek málimdemede Eýropol óziniń EU Most Wanted platformasynyń qashqyndardy izdeýde mańyzdy ról atqaratynyn atap ótti. Qazir saıtta «qyzmet retindegi zorlyq-zombylyqqa» baılanysty kúdikke ilingen úsh adam týraly aqparat jarııalanǵan. Olar kisi óltirý, esirtki saýdasy jáne aqshany jylystatý isteri boıynsha izdeýde.
Aıta keteıik, buǵan deıin Eýropol Eýroodaqta Irandaǵy qaqtyǵysqa baılanysty terrorızm qaýpiniń artqanyn málimdegen.