Eýropada taǵy da Quran órteldi, bul joly musylman jigit osyndaı áreketke bardy

STOKGOLЬM. QazAqparat - Shvetsııa astanasynda taǵy da Quran órteldi. Bul joly demarshty uıymdastyrǵan ýltraońshyl emes, ıraktyq musylman, dep habarlaıdy QazAqparat Euronews agenttigine silteme jasap.

Stokgolmde Úlken meshittiń aldynda Quran órteýge polıtsııa ruqsat bergen.

Ony uıymdastyrýshy birneshe apta buryn quqyq qorǵaý organdaryna aryz jazǵan. Sońynda oǵan aqyry múmkindik berildi.

Onyń ústine bul jolǵy aktsııany ótkizgen ýltraońshyl aǵymdardyń ókili emes, Iraktan kelgen 37 jastaǵy bosqyn musylman Salvan Momıka.

Ol bir top tártip saqshylarynyń jáne jolaı ótip bara jatqan 200-ge jýyq adamnyń kózinshe musylmannyń qasıetti kitabynyń bir danasyn órtep jiberdi.

Jalpy kópshilik onyń áreketin qoldamady.

«Biz mundaı nárselerge kóz jumyp qarap, tózimdilik kórsetpeýimiz kerek, osyndaılarǵa toqtaý salatyn kez jetti. Bireýdi qorlaý jaqsy emes», «Sóz bostandyǵy, árıne, óte mańyzdy, biraq dinı kitapty órteý - sóz bostandyǵy emes, bul múldem basqa nárse, onyń áreketin arandatýshylyq dep esepteımin» dep jatty turǵyndar.

Aktsııany uıymdastyrýshy óziniń ekinshi otany Shvetsııanyń ımıdjine nuqsan keltirgisi kelmeıtinin qaıta-qaıta qadap aıtyp, Qurandy óziniń jeke sebepterimen órtep jatqanyn jetkizdi.

Keıbir málimetterge qaraǵanda ol tipti Shvetsııanyń NATO-ǵa kirý protsesi aıaqtalǵansha kúte turǵysy kelgen.

Bul protsedýrany Túrkııa keshiktirip otyr.

Osy jyldyń qańtarynda danııalyq Rasmýs Palýdan Stokgolmdegi túrik elshiliginiń aldynda Quran órtegen kezde Túrkııa óz ustanymyn odan ári qataıtqan edi.