Eýropada sáýleti ózgeshe meshitter boı kótere bastady
ASTANA. 27 sáýir. QazAqparat - Batys elderinde sońǵy jyldary Allanyń úıi kóptep salynýda. Musylmandarǵa arnalǵan qulshylyq úıleri sáýleti jaǵynan bir-birin qaıtalamaıdy ári shyǵysqa tán dástúrli kelbetinen ózgeshe sıpat alǵan, dep jazady muslim.kz.
Máselen, Germanııanyń Keln qalasynda turǵyzylǵan musylmandardyń ǵıbadat úıi kúnge umtylǵan, qaýyzy ashylyp kele jatqan gúlge uqsaıdy. Al qala turǵyndary men qonaqtarynyń keıbireýi ony Ǵarysh keńistiginde júzgen jasandy jer serigine uqsatady.
Bul meshittiń irgetasy 2008 jyly qalanǵan bolatyn. Sońǵy jarty ǵasyrda musylmandardyń qarasy on ese artqan Germanııadaǵy júzdegen meshitterdiń biri ǵana ekenin aıta ketý kerek. Álem kartasynan meshit ataýly múldem kezdespeıtin asa iri ondaǵan ortalyqta búgingi tańda musylmandardyń qulshylyq úıi kóptep boı kótere bastady. Máselen, 2010 jyly AQSh-ta 1209 meshit bolǵan edi, qazirgi ýaqytta olardyń sany 2106-ǵa jetti. Germanııa men Frantsııadaǵy jaǵdaı da osyǵan uqsas: qazirgi ýaqytta atalǵan elderde 200 meshit salynyp jatyr. Al Máskeý bıligi musylman turǵyndarynyń sanyn shektep, meshitterdiń kóptep salynýyna qarsylyq kórsetip keledi.
Dese de, batys elderindegi meshit qurylystary oıdaǵydaı júrip jatyr deýge taǵy kelmeıdi. Óz týǵan qalalarynyń jyl ótken saıyn ózgerip, musylman mádenıetiniń ortalyqtaryna aınalyp bara jatqandaryna qynjylatyndary da bar. Olardyń arasynan ashyq qarsylyq kórsetip júrgen ksenofobtardy da ushyratýǵa bolady.
Beısen Sultan
