Eýropada oqıtyn qazaqstandyq jastar Brıýsseldegi elshimen kezdesti

BRıÝSSELЬ. QazAqparat – 26 qazanda elshilik ǵımaratynda Belgııada bilim alyp jatqan qazaqstandyq stýdentter osy eldegi Qazaqstan elshisi Aıgúl Quspanmen kezdesti, dep habarlaıdy QazAqparattyń menshikti tilshisi.

QS jáne THE reıtıngter boıynsha Belgııanyń alty birdeı ýnıversıteti «álemdegi úzdik 300 joǵary oqý ornynyń» qataryna kiredi. Belgııanyń jer kólemi Almaty oblysynan jeti ese az, biraq jalpy ishki ónim kólemi Qazaqstannan úsh ese kóp. Osy elde jıyrmaǵa tarta qazaqstandyq stýdent oqıdy. Kezdesýde A.Quspan Memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynyń negizgi baǵyttary jóninde aıtyp berdi..

«Joldaýda jastarǵa qatysty baǵyttar bar. Qazaqstannyń aldynda mańyzdy mindetter men kúrdeli syn-qaterler tur, olardy sheshý jas urpaqtyń enshisinde», - dedi qazaqstandyq dıplomat. Ol sondaı-aq jastardy jańa bilim alyp, oqýyn támamadaǵan soń týǵan eline eleýli paıda ákeletn joǵary bilikti maman bolýǵa shaqyrdy. Jastar elshilikpen WhatsApp chat arqyly únemi baılanysta ekenderin aıtty.

«Bıyl stýdentterdi Eýropa parlamentine aparamyz. Eýroparlamenttiń Ortalyq Azııa elderimen baılanys delegatsııasynyń basshysy Fýlvıo Martýshello jáne birqatar jas eýrodepýtattar olarmen kezdeskisi keledi», - dep atap ótti A.Quspan.

Sonymen qatar elshi stýdentterdi Abaıdyń 175 jyldyǵy jáne Ábý Nasyr ál-Farabıdiń 1150 jyldyǵyna, sondaı-aq Altyn Ordanyń 750 jyldyǵyna arnalǵan sharalardy ázirleýge belsendi qatysýǵa shaqyrdy.

Avtor: Tımýr Dúısekeev