Eýropada muzdyqtar 2060 jylǵa qaraı joıylýy múmkin
ASTANA. KAZINFORM – Alpi taýlaryndaǵy sońǵy muzdyqtardyń biri muzdyq mártebesinen aıyryldy, dep habarlaıdy BILD.
Aýstrııanyń Algoı Alpilerindegi Shvartsmıltsferner (Schwarzmilzferner) muzdyǵy 2026 jylǵy aptap jazdan keıin resmı túrde muzdyq mártebesinen aıyryldy. Birneshe aıǵa sozylǵan ystyq kezeńde onyń qalyńdyǵy tórt metrden astam azaıyp, kóleminiń shamamen jartysy erip ketken. Sonymen qatar muz massasy qozǵalysyn toqtatqan. Bul – muzdyqtyń negizgi belgileriniń biri.
Bavarııa ǵylym akademııasynyń glıatsıologi Krıstof Maıer bul muzdyqty 26 jyldan beri baqylap keledi. Ǵalymnyń boljamynsha, kelesi jazdan keıin Shvartsmıltsferner tolyǵymen joıylýy múmkin. 2022 jyldan beri muzdyqtyń erýi aıtarlyqtaı jyldamdaǵan. Al qysta jaýǵan qalyń qar jazǵy aptapta joǵalǵan muzdyń ornyn toltyra almaıdy.
Ǵalymnyń eskertýinshe, 2060–2070 jyldarǵa qaraı Shyǵys Alpide muzdyqtar tolyǵymen joıylýy múmkin. Óńirde jyl saıyn birneshe shaǵyn muzdyq joǵalyp jatyr.
Germanııanyń qalǵan tórt muzdyǵyna da qaýip tónip tur. 2025 jylǵa qaraı eki jyl ishinde olardyń jalpy aýmaǵy tórtten birinen astamǵa qysqarǵan. Jalpy kólemi shamamen bir mıllıon tekshe metr muz erip ketken.
Zertteýshilerdiń boljamynsha, Blaýaıs pen Vatsmann muzdyqtary jaqyn arada muzdyq mártebesinen aıyrylýy múmkin. Tsýgshpıttse taýyndaǵy Soltústik Shneeferner muzdyǵyna bul qaýip onjyldyqtyń sońyna qaraı tónedi.
Al ǵalymdardyń baǵalaýynsha, eń uzaq saqtalýy múmkin Hellentalferner muzdyǵyna da on jyldan aspaıtyn ýaqyt qalǵan.
Aıta ketelik Ortalyq Azııada muzdyqtardyń erýi men sý tapshylyǵy kúrdeli máselege aınalyp otyrǵany týraly jazǵan edik.
