Eýropada mıdy kompıýterge qosý otasy alǵash ret Mıýnhende jasaldy

ASTANA. KAZINFORM – Ota bes saǵatqa sozyldy jáne julyn cal aýrýyna shaldyqqan naýqasqa Eýropada birinshi ret jasaldy, dep habarlaıdy DW aqparat agenttigi.

Mıýnhen tehnıkalyq ýnıversıteti janyndaǵy emhana dárigerleri moınynan tómen sal aýrýyna shaldyqqan 25 jastaǵy naýqastyń mıyna elektrondy taratqyshty engizdi. Neırondyq sıgnaldardy jazý úshin mıǵa barlyǵy 256 mıkroelektrod qosyldy.

Jasandy ıntellekt negizinde jumys isteıtin qurylǵy sıgnaldar men emdelýshiniń aıaq-qoldarynyń qozǵalysy arasyndaǵy baılanystardy zerttep, dekodtaıdy. Birinshi kezeńde patsıent kompıýter monıtoryndaǵy kýrsordy oısha jyljytyp, tyshqandy «shertý» belgisin oryndaı alady. Kelesi qadam — smartfon men robotty basqarý.

2022 jyly dál osy emhanada ınsýlt saldarynan sóıleý qabileti buzylǵan naýqasqa osyndaı qurylǵy ornatylǵan. Mıýnhendik dárigerler bul jańa tehnologııany damytýdaǵy basty básekeles retinde AQSh-ty atady. Ótken jyldyń qańtarynda Ilon Masktyń Neuralink kompanııasy adam mıyna birinshi neırochıpti ımplantatsııalady, bul paıdalanýshyǵa gadjetterdi óz oıymen basqarýǵa múmkindik berdi.

Buǵan deıin elimizde neırohırýgııalyq robot mıǵa operatsııa jasaǵanyn jazǵanbyz.