Eýropada koronavırýstyń jańa túri XEC tarap jatyr
ASTANA. KAZINFORM – Medıtsınalyq sarapshylar Eýropada jáne búkil álemde taraǵan koronavırýstyń jańa nusqasy jaqynda ústem bola túsýi múmkin ekenin eskertedi, dep jazady Euronews.
XEC nusqasy qazirgi ýaqytta Eýropada basym bolǵan burynǵy Omicron KS.1.1 jáne KP.3.3 sýbvarıanttarynyń gıbrıdi retinde tarap jatyr.
Eýropalyq aýrýlardyń aldyn alý jáne baqylaý ortalyǵy (ECDC) ókiliniń aıtýynsha, jańa shtamm Densaýlyq saqtaý organdaryn alańdatatyn nusqa bolý krıterıılerine sáıkes kelmeıdi. Búgingi kúni XEC týdyrǵan jaǵdaılardyń shekteýli sany ǵana tirkeldi.
Ǵalymdar alǵash ret maýsym aıynda Berlınde XEC nusqasyn anyqtady. Sodan beri ol Eýropanyń kem degende 11 elinde jáne álemniń taǵy tórt elinde tabyldy.
AQSh-tyń kommertsııalyq emes Scripps zertteý ınstıtýtynyń málimetinshe, búgingi kúni XEC Slovenııa, Belgııa, Germanııa jáne Nıderlandydaǵy barlyq úlgilerdiń keminde 1 paıyzyn quraıdy. Scripps derekteri kórsetkendeı, ol Ulybrıtanııada, Danııada, Frantsııada, Irlandııada, Shvetsııada, Italııada jáne Ispanııada anyqtaldy.
Ǵalymdardyń pikirinshe, sımptomdar burynǵydaı. Olar sýyqqa nemese tumaýǵa uqsas: aýyrsyný, sharshaý, jótel nemese tamaq aýrýy.
Sarapshylardyń pikirinshe, qoldanystaǵy COVID-19 vaktsınalary XEC nusqasyna qarsy tıimdi bolýy tıis.
