Eýropada koronavırýs juqtyrǵandar sany artty
LONDON. QazAqparat – Eýropada koronavırýs juqtyrǵandar sany artty. Frantsııa Covid-19 vırýsyn juqtyrý jaǵdaıynyń rekordtyq kórsetkishke jetkenin málim etti, dep habarlaıdy QazAqparat Bı-Bı-Sı agenttigine silteme jasap.
Djons Hopkıns ýnıversıtetiniń málimetinshe, álemde 28,7 mln adam Covid-19 juqtyryp, 920,8 myń naýqas qaýipti indetten kóz jumǵan, 19,4 mln adam saýyǵyp ketken.
Senbi kúni frantsýz bıligi bir táýlikte 10561 adamnyń vırýs juqtyrǵanyn habarlady. Bul bir kún burynǵy kórsetkishten 1000 adamǵa kóp. Sondaı-aq Covid-19 dıagnozymen aýrýhanaǵa, jansaqtaý bólimine túsken naýqastar da kóbeıgen.
Osyǵan qaraı Frantsııanyń medıtsına salasynyń beldi mamandary halyqty jeke kezdesýlerden aýlaq bolýǵa shaqyrdy.
Maýsym aıynan beri Frantsııada aýrý juqtyrý deńgeıi barlyq jastaǵy adamdar arasynda ósti, biraq bılik bul ósim ásirese jastar arasynda kóp ekenin aıtyp otyr.
Frantsııa indetke shaldyǵýshylar ósimi baıqalǵan jalǵyz eýropalyq el emes.
Qurlyqtaǵy bılik naýryz aıynda engizilgen qatań karantındik sharalardy jeńildete bastaǵanda, aýrý juqtyrǵandardyń sany birtindep ósti, al tamyz aıynda aıtarlyqtaı artty.
Senbi kúni Frantsııa aýrýhanasyna koronavırýs dıagnozy qoıylǵan 2432 patsıent tústi. Olardyń 417-si jansaqtaý bólimine ornalastyryldy. 17 adam kóz jumdy. Jalpy alǵanda elde pandemııa kezinde qaıtys bolǵandar sany 30 myńnan asty. Frantsııa qaıtys bolǵandar sany boıynsha álemde jetinshi orynda.
Eýropanyń ózge de elderindegi jaǵdaı
Birqatar Eýropa elinde koronavırýs órship tur.
Jeksenbi kúni Chehııada úsh kúnde 1541 adam vırýs juqtyryp, rekordtyq kórsetkish tirkelgen.
Kórshiles elder Chehııadan kirýge shekteýler engize bastady.
Sársenbiden bastap Germanııa Pragadan kelýshilerdiń barlyǵynan koronavırýsqa tapsyrylǵan test nátıjesin talap etetin bolady.
Ótken beısenbide Ispanııada bir táýlikte koronavırýs juqtyrǵandar sany 10764 adamǵa jetken.
Degenmen Densaýlyq saqtaý mınıstrligi jaǵdaı turaqtalyp keledi dep málimdep otyr. Ispanııa Eýropada koronavırýs juqtyrǵandar sany boıynsha birinshi orynda. Pandemııa bastalǵannan beri bul elde 566,3 myń adam aýyryp, 29,7 myń adam qaıtys boldy.
Ispan taǵynyń 14 jastaǵy murageri Hanshaıym Astýrııskaıa Leonor synyptastarynyń birinen Covid-19 dıagnozy rastalǵannan keıin karantınge jiberildi. Endi Madrıdtiń Santa-Marııa-de-los-Rosales mektebiniń barlyq oqýshylary koronavırýsqa test tapsyrýy kerek.
Ulybrıtanııada demalys kúnderi vırýs juqtyrǵandar sany 4 myńnan asty. Elde adamdardyń kóptep jınalýyna qaıtadan tyıym salyndy. Anglııa men Shotlandııada endi 6-dan kóp adamnyń jınalýyna tyıym salyndy.
