Eýropada «Kıaran» daýylynan 12 adam kóz jumdy

Juma kúni Eýropany sharpyǵan «Kıaran» daýyly qurbandarynyń sany 12-ge jetti. Kazinform bul týraly Euronews-ke silteme jasap habarlaıdy. 

«Atlant muhıtynyń jaǵalaýyna jetip, shyǵysqa qaraı jyljyǵan daýyl Italııanyń soltústik-ortalyǵyndaǵy Toskanada bes adamnyń ómirin qıdy. Bul jerde jaýyn-shashyn mólsheri rekordtyq deńgeıge jetti», - dep habarlady jergilikti bılik.

Florentsııada jaǵdaı asa kúrdeli, dep eskertti mer Darıo Nardella. Arno ózenindegi sý tasqyny juma kúni sharyqtaý shegine jetedi dep boljanyp otyr.

Qatty jelden talaı aǵash qulap, adam ólimine ákep soqtyrǵan. Saldarynan Belgııada eki adam, Frantsııada eki adam, Madrıd ortalyǵynda bir adam, Germanııada bir adam jáne Nıderlandta bir adam kóz jumdy.