Eýropada kezekti Grekııa transhy jóninde kelissózder qaıta bastaldy
ASTANA. 13 qyrkúıek. QazAqparat - Halyqaralyq kredıtorlar úshtigi - Eýrokomıssııa, Eýropalyq ortalyq bank jáne Halyqaralyq valıýtalyq qor - kezekti Grekııa transhy: segiz mıllıard eýro boıynsha kelissózder qaıta bastaldy, dep habarlaıdy Euronews.
Budan buryn Afına bıýdjet tapshylyǵyn qysqartý boıynsha óziniń ýádesin tolyǵymen oryndamaýy saldarynan kelissózder toqtap qalǵan bolatyn.
«Men búgin bastalǵan Úshtikpen kelissózderdiń nátıjesin taǵatsyzdana kútýdemin. Qarjylandyrý baǵdarlamasyn jalǵastyrý úshin bizge Eýrokomıssııa, HVQ jáne Eýropalyq ortalyq banktiń sońǵy sheshimi qajet», - dep málimdedi Eýropalyq keńestiń tóraǵasy German van Rompeı.
Osy oraıda Grekııany eýro aımaqtan shyǵarýǵa shaqyrý jaıy taǵy sóz bolmaq.
Taıaýda grek úkimeti Úshtikpen kezdesip, ekonomıkany qutqarý sharalarynyń jańa paketi týraly, atap aıtqanda, turǵyn úı salyǵyn kóbeıtý jóninde jarııalady.
Afınaǵa jańa transh aýadaı qajet: eger sheteldik kómek toqtatylsa, Grekııa birneshe aptadan keıin-aq defoltqa ushyraýy múmkin.
