Eýropada qazaqstandyq anımatsııalyq fılm tanystyryldy
ASTANA. QazAqparat - Latvııa astanasy Rıgada shahmattan jasóspirimder arasyndaǵy Eýropa chempıonatynda qazaqstandyq «Shahmat patshalyǵy» 3D anımatsııalyq fılminiń tanystyrylymy ótti, dep habarlaıdy QazAqparat tilshisi.
«Rıgada 8 ben 18 jas aralyǵyndaǵy er jáne qyz balalar arasynda shahmattan Eýropa chempıonaty bastaldy. Chempıonattyń ashylý saltanatynda «Shahmat patshalyǵy» anımatsııalyq fılmin tanystyrdym. Aýdıtorııa keń aýqymdy boldy 47 elden 1 080 bala, odan bólek ata-analar, bapkerler jáne sýdıalar bar. Qurmetti qonaqtardyń ishinde Kırsan Ilıýmjanov, Latvııanyń qarjy mınıstri jáne halyqaralyq grossmeıster Dana Reıznıetse-Ozola, odan bólek bilim mınıstri, Rıga qalasynyń meri orynbasary, depýtattar, jýrnalıster, shahmat sheneýnikteri jáne taǵy basqalar boldy», -dedi qazaqstandyq shahmatshy, halyqaralyq grossmeıster Dármen Sádýaqasov Feısbýktegi paraqshasynda.
Aıta keteıik, «Shahmat patshalyǵy» QR Aqparat jáne kommýnkatsııalar mınıstrliginiń qoldaýymen, «Balapan» telearnasynyń tapsyrysymen «D.Sádýaqasov atyndaǵy shahmat akademııasy» daıyndaǵan 32 serııadan turatyn anımatsııalyq fılm. Mýltfılm 3D formatta jáne úsh tilde ázirlengen.
