Eýropada Qazaqstandaǵy shytyrman oqıǵaly týrızm týraly fılm kórsetiledi
NUR-SULTAN. QazAqparat – Qazaqstannyń shytyrman oqıǵaly týrızminiń (adventure tourism) múmkindikteri týraly rolıktiń túsirilimi jáne osyǵan baılanysty mototýr aıaqtaldy. Bul týraly «Kazakh Tourism» kompanııasy málim etti, dep habarlaıdy QazAqparat tilshisi.
Jobaǵa Exponential Kazakhstan kompanııasy muryndyq bolyp otyr. Kompanııa Kazakh Tourism jáne QR Ulttyq mýzeıiniń qoldaýymen osy jobaǵa endýrodan (motokross) álem chempıony, ıspanııalyq Djozep Garsııany tartty.
«Keshe túsirilim tobynyń Qazaqstanǵa jasaǵan 20 kúndik saıahaty aıaqtaldy. Altynemel, Sharyn, Kólsaı kólderi, Іle Alataýy sııaqty tabıǵat parkterin, Aqmola jáne Almaty oblystarynyń, Almaty qalasynyń kórikti jerlerin, Nur-Sultandaǵy Ulttyq mýzeıdi, Báıterek, bolashaqtyń «Nur Álem» mýzeıin, Hanshatyrdy túsirdik. Saryarqa óńirinde estafetany tanymal mototrıalshy, 2018 jylǵy álem chempıony Djeronı Fahardo @JeroniFajardo qabyldap aldy. Almaty oblysy men Almatydaǵy túsirilimdi motokrosstan bıylǵy álem chempıony @josepgarcia26 júrgizdi», - delingen kompanııanyń Facebok-tegi paraqshasynda.
Eýropadan kelgen qonaqtar Býrabaıǵa baryp, sulý Kókshe ólkesinde tabıǵat aıasynda tamasha kadrlar túsirdi.
Elordaǵa oralǵan soń Ulttyq mýzeıdiń 5 jyldyǵyna oraı Djeronı Fahardo mototsıkl minýden sheberlik sabaǵyn ótkizdi. Odan ári bir top motobaıkerlermen qala qydyryp ketti. Tanymal mototrıalshy Hanshatyrdyń aldynda saýda ortalyǵyna kelgenderdi ónerimen tánti etti. Kún sońynda túsirilim toby «Nur-Álem» pavılonyna baryp, sonyń aldynda mototsıklmen asyr saldy.
Joba basshysy Florıan Behrendtiń aıtýynsha, fılm bıyl qysqa qaraı Eýropanyń basty sport telearnalarynda kórsetiledi.
Osy joba Qazaqstannyń týrıstik áleýetin Eýropa elderine tanytý maqsatyn kózdeıdi.
Aıta keteıik, jobany memleket qarajatynsyz Germanııa kompanııasy iske asyryp otyr.
