Eýropada qatty aıazdan 20-dan astam adam kóz jumdy
ASTANA. QazAqparat - Qystyń qytymyr minezi eýropalyqtardy da ábigerge saldy. Sońǵy 2 kún ishinde munda qatty aıazdan 20-dan astam adam kóz jumǵan, dep habarlaıdy Habar 24 telearnasy.
Marqumdardyń kóbisi polshalyq bolyp shyqty. Eldiń kóp bóliginde aýa temperatýrasy 20 gradýsqa deıin tómendegen. Ádette munda qańtardaǵy ortasha temperatýra shamamen - 1, - 5 gradýs bolatyn. Aýa raıynyń qolaısyzdyǵynan kórshiles Germanııa men Chehııa da japa shegip otyr. Sonymen qosa Italııa men Bolgarııada da aıazdan úsip ólgender bar. Kóptegen óńirde joldar jabylyp, temirjol qyzmeti kidirispen jumys istep jatyr. Kúnniń qatty sýytýyna baılanysty Belgııa men Lıýksembýrg arasyndaǵy poıyzdar qatynasy ýaqytsha toqtatylǵan.
