Eýropada qar jaýdy

ASTANA. KAZINFORM – Ortalyq Eýropa men Balqanda qar jaýdy. Buryn bul aımaqtardyń turǵyndary ádetten tys ystyq kóktemdi bastan ótkergen edi. Aýa temperatýrasy 30°C-qa jetken bolatyn, dep habarlaıdy Euronews.

Eýropadaǵy aýa raıy taǵy da tańǵaldyrdy. Aýstrııanyń keı jerlerinde seısenbiden beri qar jaýyp jatyr, demalys kúnderi aýa temperatýrasy 30 gradýstan joǵary bolǵan. Atap aıtqanda, Karıntııadaǵy Paksattel asýy qar astynda qaldy. 

Birneshe kólik apaty boldy. Kóptegen jolda júrgizýshilerden arnaıy shynjyrlar taǵý talap etildi. Tótenshe jaǵdaılar qyzmeti qar basqan aǵashtar joldar men elektr jelilerine qulap ketedi dep qaýiptenip otyr.

Horvatııanyń Zagore qalasynda da qar jaýyp, Petrovsko, Hým-na* Sýtlı, Pregrada, Djýrmanets, Radoboı jáne Esene eldi mekenderiniń bir bóligin qar jamyldy. Eldiń keı jerlerinde qar aralas jańbyr jaýdy. Turǵyndar gúldengen jemis aǵashtaryna zııan tıgizetin qatqaq bolmaıtynyna úmittenip otyr.

Eki kúndik aptap ystyqtan keıin Rýmynııadaǵy aýa temperatýrasy 20°S-qa derlik kúrt tómendedi. Eldiń soltústik-batysyndaǵy Klýj-Napoka qalasyna naǵyz qys keldi. Eger seısenbide múndaǵy termometr baǵanasy 25°C kórsetse, sársenbide 4°C boldy. Klımatologtardyń pikirinshe, aýa raıynyń mundaı qubylýy jahandyq jylynýǵa baılanysty bolyp otyr.

«Jer sharyndaǵy ekojúıeler men klımattyq jaǵdaıdyń qalaı ózgerip jatqanyn is júzinde kórýge bolady. Amal qansha, soǵan úırený kerek», - dedi jergilikti turǵyndardyń biri.

Bosnııa men Gertsegovınanyń taýly aımaqtary men el astanasy Saraevo da qar astynda qaldy. Bul rette mundaǵy aýa temperatýrasy buǵan deıin shamamen 30 °C-qa jetti. Bul – Balqandaǵy kóktemge tán emes qubylys.