Eýropada gaz baǵasy áli arzandap jatyr
ASTANA. KAZINFORM - Eýropada gaz baǵasy 2022 jyl sońyndaǵy kórsetkishtermen salystyrǵanda 2023 jyly shamamen 60%-ǵa arzandady. Baǵanyń tómendeýi negizinen gazdyń rekordtyq qorlary men jańartylatyn energııa kózderi esebinen jalǵasýda, dep jazady TASS aqparat agenttigi.
Bul týraly jeksenbide Bloomberg agenttigi habarlady.
Ótken jyldyń qazan aıynda Palestına-Izraıl qaqtyǵysynyń shıelenisýine jáne Qyzyl teńiz arqyly halyqaralyq jetkizilimder týdyrǵan máselelerge qaramastan Eýropada suıytylǵan tabıǵı gaz baǵasynyń tómendeýi jalǵasyp jatyr.
Agenttik bul jaǵdaıdy gazdyń rekordtyq qory, jańartylatyn energııany damytýǵa ınvestıtsııanyń kóp salynýy jáne iri ónerkásiptik elderde energııaǵa suranysty shekteıtin álsiz ekonomıkalyq ósýmen baılanystyryp otyr.
Alaıda baǵanyń tómendeýi toqtap, Eýropa elderi, sondaı-aq Japonııa, AQSh jáne Qytaı taǵy da daǵdarysqa ushyraý qaýpi bar.
«Tek baǵaǵa qarasaq, daǵdarys bitken sııaqty kórinýi múmkin. Eger jetkizilim kenetten qysqarsa nemese salqyn kún raıy uzaqqa sozylsa, baǵa osy jylytý maýsymynda da qaıta ósýi múmkin», — dep keltiredi agenttik MET International shveıtsarııalyq zertteý kompanııasynyń STG saýda bóliminiń basshysy Balınt Konts sózin.
STG tranzıtin qurýǵa iri halyqaralyq ınvestıtsııa salynǵanyna qaramastan jańa qýattyń kóbi 2025 jáne 2026 jyldarǵa deıin bolmaıdy.
Al Reseı Federatsııasynan Ýkraına arqyly Batys jáne Ortalyq Eýropa elderine gaz tasymaldaıtyn tranzıttik jeli týraly kelisimi osy jyldyń sońynda aıaqtalady.
«Kelisim uzartylatyny týraly aqparat joq. Jelini jabý gaz jetkizý kólemin azaıtady. Buǵan qosa, jıi bolatyn ekstremaldy aýa raıy jaǵdaıy energetıkalyq júıege salmaq salyp, STG-ǵa suranysty arttyrýy múmkin» delingen TASS habarlamasynda.
