Eýropada et kombınattary koronavırýstyń jańa oshaǵyna aınaldy
NUR-SULTAN. QazAqparat – Eýropada et óndirisiniń iri kásiporyndary koronavırýs ınfektsııasynyń jańa oshaǵyna aınaldy, dep habarlaıdy QazAqparat Euronews agenttigine silteme jasap.
Frantsııanyń soltústigindegi Kot-d’Armor departamentinde Kermene qasaphanasynan koronavırýs juqtyrǵan 69 jańa oqıǵa anyqtaldy. Zaýyttyń 800 qyzmetkeri keıin testileýden ótti. Lýar departamentindegi Tradival qasaphanasynyń 54 jumysshysy vırýs juqtyrǵan. Jergilikti zaýyt bıliktiń qaýipsizdik sharalaryn qoldanǵanyna qaramastan, kásirorynnyń tehnıkalyq jaǵy eskirgen málimdedi.
Germanııada Tómengi Saksonııa jerinde et óńdeý kombınatynyń 92 qyzmetkeri koronavırýs juqtyrǵan. Soltústik Reın-Vestfalııa jerinde zaýytta 150-den astam adamnyń vırýs juqtyrǵany anyqtaldy. Atalǵan kásiporyndardyń kóptegen qyzmetkeri — Rýmynııa men Bolgarııadan kelgen eńbek mıgranttary.
«Ar-namys pen ádildik úshin» qaıyrymdylyq qaýymdastyǵynan Pıter Kossen Lengerh qalasyndaǵy mıgranttarǵa kómektesedi.
«Adamdar tar páterlerde syǵylysyp turady. Náresteler men mektep jasyndaǵy balalar bar, mundaı jaǵdaıda ne bolaryn elestetý de qıyn. Bul páterler kóbinese jumys berýshiniń menshiginde, sondyqtan mıgranttar kelisimshart aıaqtalǵannan keıin olar páterden shyǵarylady», - dedi Pıter Kossen.
Germanııa bıligi baqylaýdy kúsheıtýge ýáde berdi jáne merdigerler men qosalqy merdigerler arqyly qyzmetkerlerdi jaldaý úshin tyıym salynady nemese shekteý qoıylady. Germanııanyń Eńbek mınıstri Hýbertýs Haıl qazirgi ahýaldy «uıymdasqan jaýapsyzdyq» dep atap, osy salada tártip ornatýǵa shaqyrdy.
